Kryeministri i Mbretërisë së Bashkuar, Keir Starmer, i ka bërë thirrje presidentit amerikan Donald Trump që të distancohet nga çdo veprim ushtarak ndaj Iranit, duke paralajmëruar për një “rrezik të vërtetë për përshkallëzimin e konfliktit”.
Në deklaratat e tij publike, Starmer theksoi rëndësinë e kërkimit të një zgjidhjeje diplomatike dhe u bëri apel të gjitha palëve që të kontribuojnë në këtë drejtim.
“Zgjidhja nuk është ushtarake, por diplomatike. Duhet të shmangim çdo veprim që mund të çojë në përplasje më të mëdha,” tha ai.
Starmer gjithashtu bëri të ditur se janë zhvilluar “shumë raunde bisedimesh me SHBA-në” dhe nënvizoi se kjo është “rruga e vetme për zgjidhjen e çështjes”.
Komentet e kryeministrit vijnë vetëm pak orë përpara se ministri i Jashtëm britanik, David Lammy, të udhëtojë drejt Uashingtonit, ku pritet të takohet me Sekretarin amerikan të Shtetit, Marco Rubio.
Takimi, i planifikuar për mbrëmjen e së enjtes, do të fokusohet në situatën në Lindjen e Mesme dhe do të shqyrtojë mundësitë për uljen e tensioneve në rajon.
