Dhjetëra qytete në Spanjë, Itali dhe Portugali u përfshinë së fundmi nga protesta të organizuara kundër turizmit masiv, me organizatorët në Barcelonë që i bënë thirrje pjesëmarrësve të sillnin pistoleta uji për t’i drejtuar ndaj turistëve në mënyrë simbolike.
Protestuesit argumentojnë se turizmi i pakontrolluar ka çuar në rritjen e kostove të jetesës, mungesë banesash të përballueshme për vendasit dhe mbipopullim të zonave urbane. Fushata në Spanjë mban emrin “Më pak turizëm, më shumë jetë”. Protestuesit pretendojnë se situata aktuale po sjell “shkatërrim të territorit, pasiguri ekonomike, krizë banimi dhe humbje të të drejtave”.
Protestat u mbajtën në qytete si Barcelona, Granada, Palma dhe Ibiza në Spanjë, Lisbonë në Portugali, si dhe në destinacione të njohura italiane si Venecia, Genova, Palermo, Milano dhe Napoli. Ky reagim vjen pas raportimeve për kampe të përkohshme në Ibiza, ku dhjetëra persona jetojnë pa ujë, energji ose shërbime bazë.
Zemërimi i protestuesve është i drejtuar kryesisht ndaj Airbnb dhe rritjes së qirave afatshkurtra, të cilat siç thonë ata po përjashtojnë vendasit nga lagjet e tyre. Carmen Naranjo, një studente 21-vjeçare nga Barcelona, deklaroi për Sky News se “qyteti është kthyer në një park lojërash për turistët”, dhe se për shkak të mbipopullimit janë mbyllur disa prej vendeve që frekuentoheshin nga banorët.
Edhe Txema Escorsa, banor i Barcelonës, tha se ndjehet i lodhur nga presioni dhe është ndalur së përdoruri Airbnb gjatë udhëtimeve të tij, pasi “në fund e kupton që kjo po ua merr banesat njerëzve”.
Nga ana tjetër, Jaime Rodríguez de Santiago, drejtor i përgjithshëm i Airbnb për Spanjën dhe Portugalinë, u shpreh se “politikanët kanë gjetur një fajtor të lehtë për të justifikuar dështimet e tyre në politikën e strehimit dhe të turizmit gjatë dekadave të fundit”. Ai shtoi se hotelet vazhdojnë të jenë forma kryesore e akomodimit për turistët, me 20 milion vizitorë që qëndruan në hotele në Barcelonë gjatë 2024, krahasuar me 12 milion që përdorën banesa me qira.
Protestat vijnë ndërsa shpenzimet ndërkombëtare për udhëtime në Europë pritet të rriten me 11%, duke arritur në 617 miliardë paund këtë vit. Spanja ka pritur 94 milionë turistë të huaj në 2024, një rekord historik që mund të tejkalohet edhe më tej në 2025, sipas parashikimeve të ministrisë së ekonomisë.
Ndërkohë, autoritetet vendore në Barcelona kanë propozuar mbylljen graduale të apartamenteve turistike, ndërsa Pompei dhe destinacione të tjera të njohura kanë njoftuar masa për të kufizuar numrin e vizitorëve ditorë, në përpjekje për të balancuar interesat ekonomike me ato shoqërore dhe mjedisore.
Në Portugali, demonstrata të ngjashme u mbajtën në Lisbonë, ku banorët denoncuan rritjen e çmimeve, zhvendosjen e komuniteteve tradicionale dhe mbipopullimin e zonave historike. Aktivistët e shoqërisë civile kërkuan më shumë rregullim të tregut të banesave dhe ndërhyrje ndaj monopoleve të turizmit dixhital që po përthithin qendrat urbane.
Edhe Italia u përfshi fuqishëm në protestat e koordinuara. Tubime u organizuan në Venecia, Genova, Palermo, Milano dhe Napoli, ku aktivistët ngritën shqetësime të ngjashme mbi zhdukjen e tregjeve lokale, mbylljen e bizneseve tradicionale, rritjen e ndjeshme të qirave dhe transformimin e qyteteve në “vitrina për turistë”.
Në Venecia, ku është në fuqi një taksë për hyrje dhe kufizime ditore për vizitorët, banorët kërkojnë masa më të ashpra për të ruajtur jetën sociale dhe mjedisore të lagunës historike.
Zemërimi qytetar po përshkallëzohet në të gjithë Europën jugore, në një kontekst kur shpenzimet ndërkombëtare për udhëtime pritet të rriten me 11% në 2025, duke arritur në 617 miliardë paund. Spanja priti një rekord prej 94 milionë turistësh në vitin 2024, ndërsa pritet që këtë vit shifra të arrijë në 100 milionë./ Monitor
