Ditët e sotme deputetët e Kuvendit të Kosovës do të mblidhen për herë të 33-të në përpjekje për konstituimin e Kuvendit, mes një situate të vazhdueshme bllokimi.
Seancat tashmë janë shndërruar në një procedurë të përsëritur çdo 48 orë, pa ndonjë përparim të dukshëm në zgjedhjen e kryetarit të Kuvendit.
Lëvizja Vetëvendosje vazhdon të mbështesë kandidaturën e Albulena Haxhiut për postin e kryeparlamentares, megjithëse partitë tjera opozitare kanë deklaruar qartë se nuk do ta votojnë atë.
PDK dhe AAK i kanë kërkuar LVV-së të propozojë një emër tjetër, ndërsa LDK ka bërë të ditur se nuk do të mbështesë asnjë kandidat.
Seanca e radhës pritet të nisë sot në orën 10:00, me pak gjasa për ndonjë zgjidhje të menjëhershme të ngërçit institucional.
