Disfatën e opozitës në zgjedhjet parlamentare të 11 Majit, politologu Ilir Kalemaj ia “faturon” drejtuesve politikë në Qarqe. Ai thotë se shumë prej tyre nuk kishin lidhje me elektoratin dhe disa të tjerë ishin figura të konsumuara.
I ftuar në MCN, Kalamaj deklaroi se po ashtu për zgjedhjet e 11 Majit nuk funksionuan as strukturat e partisë, teksa shtoi se PD duhet të jetë më e madhe se baza militante.
“Nuk funksionoi, pjesa e drejtimit politik në qarqe, në pjesën më të madhe të tyre, edhe për shkak të qarqeve të gabuara në disa raste, edhe për shkak të konsumit 30-vjeçar në raste të tjera, apo nuk kishin lidhje me qarkun e duhur.
Nuk funksionuan strukturat. Absurde që PD e shekullit 21 duhet të garojë me PS-në, 90 vjet parti me struktura, patronazhistë, si një parti masovike dhe jo si parti elektorale. Duhet të zgjedhë persona elektoralisht të testueshëm.
Jam dakord që partia duhet të jetë më e madhe se baza militante e ngushtë atyre dhe personat që janë në drejtim të partisë, sekretariateve nuk duhet të përfaqësojnë pjesën më radikale të partisë . Për të mos thënë paaftësinë organizative në shumë raste, apo paaftësinë që kanë të bëjnë me IQ apo me gjërat që e bëjnë atraktive një parti politike.” – tha Kalemaj.
