Presidenti i Shteteve të Bashkuara të Amerikës, Donald Trump, së bashku me administratën e tij, po shqyrton zbatimin e kufizimeve të udhëtimit në 36 vende të tjera , përfshirë disa partnerë kryesorë të SHBA-së si Egjipti dhe Xhibuti.
Një memorandum që parashikon të gjithë këtë, është nënshkruar nga Sekretari i Shtetit, Marco Rubio dhe i është dërguar diplomatëve amerikanë ditën e shtunë. Këto vende, kanë kohë 60 ditë të përmbushin kërkesat e reja të përcaktuara nga Departamenti i Shtetit, raporton The Independent.
Lista e vendeve që mund të përballen me kufizime vizash, ndalime udhëtimi ose kufizime të tjera përfshin 25 vende në Afrikë : Angola, Benini, Burkina Faso, Kepi i Gjelbër, Kameruni, Bregu i Fildishtë, Republika Demokratike e Kongos, Xhibuti, Etiopia, Egjipti, Gaboni, Gambia, Gana, Liberia, Malavi, Mauritania, Nigeri, Nigeria, Sao Tome dhe Principe, Senegali, Sudani i Jugut, Tanzania, Uganda, Zambia dhe Zimbabve.
Disa vende të Karaibeve janë gjithashtu në listë: Antigua dhe Barbuda, Dominica, Saint Kits dhe Nevis dhe Saint Lucia.
Janë gjithashtu katër vende në Azi të listuara: Butani, Kamboxhia, Kirgistani dhe Siria; dhe tre vende në Oqeani: Tonga, Tuvalu dhe Vanuatu.
Sipas memorandumit, disa prej vendeve nuk kanë përmbushur kritere të ndryshme, siç mund të jetë “mungesa e një autoriteti qeveritar qendror kompetent ose bashkëpunues” për të ofruar dokumente identiteti të besueshme ose një numër i madh qytetarësh që kanë shkelur kushtet e vizave të tyre. Megjithatë, memorandumi përfshinte një paralajmërim: nëse një vend është i gatshëm të pranojë shtetas të vendeve të treta që po dëbohen nga Shtetet e Bashkuara, kjo do të lehtësonte shqetësime të tjera.
Këto vende kanë kohë deri në orën 8 të mëngjesit të së mërkurës për t’i paraqitur Departamentit të Shtetit një plan fillestar veprimi për të përmbushur kërkesat e reja. Është e paqartë nëse kufizimet e udhëtimit do të hyjnë në fuqi pas këtij afati.
Në janar, Trump nënshkroi një urdhër ekzekutiv duke i kërkuar Departamentit të Shtetit të identifikonte vendet “për të cilat informacioni i verifikimit dhe shqyrtimit është aq i mangët sa të justifikojë një pezullim të pjesshëm ose të plotë” për shtetasit nga ato vende.
Këto veprime janë pjesë e axhendës më të gjerë anti-imigracion të presidentit, përfshirë atë që ai e ka quajtur ” operacioni më i madh masiv i deportimit” në historinë amerikane që synon emigrantët pa dokumente dhe revokimin e vizave dhe mbrojtjeve humanitare për dhjetëra mijëra emigrantë.
