Dy të rinj janë shpallur fajtorë për vrasjen e 33-vjeçarit shqiptar, Ervin Baraku, në një ngjarje tronditëse që ndodhi në stacionin nëntokësor Seven Sisters në korrik të vitit të kaluar.
Kevin Nguyen, 21 vjeç, me banim në rrugën Westerfield në Tottenham, u shpall fajtor për vrasje sot nga Gjykata e Lartë e Brendshme e Londrës. Ndërkohë, bashkëpunëtori i tij, Milumo Pedrinho, gjithashtu 21 vjeç dhe banues në rrugën Stonebridge, e kishte pranuar fajësinë për të njëjtën akuzë më 24 prill 2024.
Të dy do të paraqiten sërish në gjykatë të hënën, më 16 qershor, ku do të caktohet data për dënimin e tyre.
Sipas hetimeve të Policisë së Transportit Britanik, ngjarja ndodhi më 23 korrik 2024, pak para orës 09:00 të mëngjesit. Sipas pamjeve të kamerave të sigurisë dhe dëshmive të dëgjuara në gjykatë, Nguyen pati një përplasje me viktimën në rrugë, pas së cilës Baraku u ndoq me vrap drejt stacionit nga Pedrinho, i cili mbante një thikë të madhe, dhe nga Nguyen që e ndiqte pas.
Baraku rrëshqiti dhe ra nga shkallët brenda stacionit, ku më pas u qëllua me thikë në gjoks nga Pedrinho. Të dy agresorët u larguan me shpejtësi nga vendngjarja, ndërsa viktima mbeti i shtrirë në gjendje të rëndë.
Pavarësisht ndërhyrjes së shpejtë të paramedikëve dhe dërgimit në spital, Ervin Baraku ndërroi jetë një javë më vonë, më 30 korrik, si pasojë e plagëve të marra.
Nguyen u arrestua vetëm një ditë pas ngjarjes, më 24 korrik, ndërsa Pedrinho u ndalua tri ditë më vonë, më 27 korrik.
Superintendent Detektiv Sam Blackburn deklaroi: “Ky ishte një sulm krejtësisht i pakuptimtë dhe tragjik që përfundoi me humbjen e një jete njerëzore. Nuk ka vend për dhunë në rrjetin hekurudhor. Jam i kënaqur që të dy autorët do të përballen me pasojat e këtij krimi brutal. Ndonëse asnjë dënim nuk mund ta zëvendësojë humbjen e një njeriu të dashur, shpresoj që drejtësia t’i sjellë njëfarë paqeje familjes së Ervinit.”
