Në Gjykatën Themelore të Prishtinës edhe sot do të vazhdojë seanca për rastin “Banjska”. Seanca do të fillojë nga ora 09:30.
Dëshminë i pari e nisi dje zyrtari i Policisë Elez Peci, i cili tregoi se si i ndjeri Afrim Bunjaku, më 23 shtator të vitit 2023 e kishte orarin si zakonisht, për të filluar me patrulla.
Më pas, Peci rrëfeu si e kuptuan se mbi urën e fshatit Banjskë ishin vendosur kamionë për të bllokuar hyrjen.
“Më 23 shtator të vitit 2023, orarin e kishte rreshteri i ndjerë, Afrim Bunjaku. Si zakonisht kemi filluar ma patrulla, edhe pse lëvizjet i kemi pasur të kufizuara. Arsyeja dihet se ka qenë rreziku. Deri në orën 2:00 kemi qenë në terren në komunën e Zveçanit bashkë me Fahri Shalën. Në 2 jemi kthyer në stacion, në ora 2:30 me radio lidhje është njoftuar dhoma komanduese nga njësia NJSh kufitare, se në fshatin Banjskë mbi urë janë vendosur dy kamionë dhe ishte bllokuar hyrja e fshatit. Banjska është në Zveçan. I ndjeri Afrim Bunjaku na ka thirrë neve policëve, na ka dhënë detyrat, jemi pajisur me antiplumba, helmeta dhe të tjera pajisje policore. Kam qenë në automjet me rreshterin e ndjerë Afrim Bunjakun”, ka thënë Peci në dëshminë e tij.
Më tej, zyrtari i Policisë Peci tregoi detaje të frikshme edhe të momentit të shpërthimit.
Pas zyrtarit policor, Elez Peci, i cili zbuloi detaje drithëruese nga sulmi i 24 shtatorit të vitit 2023, aty u rrëfye edhe Avni Shala, po ashtu zyrtar policor.
Shala ka treguar se si shpërthimi pranë barrikadave me dy kamionë zbardhi rrugën pasi siç tha polici, ishte shumë i fuqishëm.
