Pas sulmeve të Izraelit ndaj iranit, presidenti amerikan Donald Trump ka deklaruar se ishte i informuar paraprakisht dhe theksoi se Teherani nuk duhet të zotërojë kurrë armë bërthamore.
Në një intervistë për rrjetin televiziv amerikan Fox News, Trump u shpreh: “Irani nuk mund të ketë bombë bërthamore dhe shpresojmë të rikthehemi në tryezën e negociatave. Do të shohim. Ka disa njerëz në udhëheqje që nuk do të rikthehen.”
Deklarata e Trump vjen në prag të një raundi të ri negociatash SHBA-Iran për programin bërthamor të këtij të fundit, që pritet të mbahet të dielën në Oman.
Sipas Fox News, presidenti ka theksuar gjithashtu se SHBA është e gatshme të mbrojë veten dhe Izraelin nëse Irani reagon ushtarakisht. Ai shtoi se komanda ushtarake amerikane për Lindjen e Mesme (Centcom) është në gjendje gatishmërie, ndërsa administrata e tij kishte informuar të paktën një aleat kyç në Lindjen e Mesme për sulmet, pa qenë vetë e përfshirë në to.
Ndërkohë, Sekretari amerikan i Shtetit Marco Rubio deklaroi më herët se Izraeli ndërmori veprime të njëanshme kundër Iranit: “Nuk jemi të përfshirë në këto sulme dhe prioriteti ynë është mbrojtja e forcave amerikane në rajon.” Ai paralajmëroi gjithashtu se Irani nuk duhet të synojë interesat apo personelin amerikan.
Nga ana tjetër, ambasadori i Izraelit në OKB, Danny Danon, theksoi se vendimi për të goditur Iranin ishte i pavarur, megjithëse shtoi se bashkëpunimi me SHBA vazhdon.
Rrjeti shtetëror izraelit Kan, duke cituar një zyrtar të paidentifikuar, raportoi se Izraeli ka qenë në koordinim të plotë me Uashingtonin dhe kishte informuar SHBA-në përpara se të ndërmerrte sulmet. Sipas këtij burimi, raportimet për një përçarje mes dy aleatëve ishin të rreme dhe pjesë e një strategjie për të çorientuar Iranin.
