Orëve të fundit është përfolur për një largim të mundshëm të trajnerit Franco Foda nga Kosova, pas një propozimi nga Al-Wahda, ekip ky i Emiratave Arabe.
Kryetari i Federatës së Futbollit të Kosovës (FFK), Agim Ademi, i ka qetësuar të gjithë tifozët, përmes një reagimi.
“Pas raportimeve se përzgjedhësi Franco Foda është pranë largimit nga posti i tij në Kombëtaren tonë, dëshiroj të informoj opinionin publik se as unë, si President, dhe as FFK-ja si institucion, nuk kemi marrë asnjë njoftim zyrtar nga përfaqësuesit e përzgjedhësit Foda apo nga ndonjë palë tjetër.
Foda aktualisht ka obligime kontraktuale me ne dhe presim që ato obligime të përmbushen, veçanërisht tani, në këtë fazë të rëndësishme të fushatës kualifikuese për Kampionatin Botëror, drejt së cilës shkojmë me optimizëm dhe dëshirë të madhe për sukses”– tha ai.
