Prokuroria e Tiranës ka regjistruar një procedim penal për veprën penale “Zbulimi i akteve ose të dhënave sekrete”, në lidhje me publikimin në media dhe portale të një videoje të ndjeshme që lidhet me ngjarjen tragjike në shkollën 9-vjeçare “Fan Noli”, ku humbi jetën i mituri Martin Cani.
Video u publikua fillimisht nga gazetari Eraldo Harlicaj, ku tregohej momenti kur të miturit hyjnë në një rrugicë për tu “sqaruar”, te vendi, ku dhe ndodhi vrasja.
Sipas prokurorisë, pamjet filmike të publikuara, të datës 18 nëntor 2024, përmbanin jo vetëm të miturit që shfaqen drejt vendit të ngjarjes, por edhe etiketimet me të dhënat e tyre personale.
Sipas Prokurorisë, pamjet e publikuara përputhen plotësisht me materialet filmike të administruara si prova në fashikullin hetimor, të cilat janë siguruar përmes kamerave të sigurisë që mbulojnë zonën ku ndodhi ngjarja.
Prokuroria sqaron se këto pamje, ishin administruar më parë në fashikullin hetimor nga organi i akuzës dhe ishin vendosur në një CD që iu dorëzua mbrojtësit ligjor të familjes së viktimës, me kushtin e qartë për mospublikim.
Çështja ndodhet aktualisht në gjykim në themel në Gjykatën e Tiranës dhe po zhvillohet me dyer të mbyllura, për shkak të përfshirjes së të miturve si të pandehur, viktimë dhe dëshmitarë.
