Të paktën nëntë persona kanë humbur jetën pas një sulmi me armë zjarri në një shkollë në qytetin Graz të Austrisë. Lajmi është raportuar nga media austriake “Kronen Zeitung”.
Ngjarja ka ndodhur në shkollën e mesme “BORG”. Sipas autoriteteve, sulmi ndodhi të martën rreth orës 10:00. Forca të shumta të policisë kanë rrethuar zonën.
Numri i të vdekurve u njoftua nga mediat lokale, teksa ministri i Brendshëm Gerhard Karner ende nuk e ka konfirmuar atë.
Brenda godinës janë dëgjuar disa të shtëna, dhe menjëherë është dhënë alarmi. Aktualisht, ndërtesa e shkollës është nën kontroll.
Sulmuesi thuhet se u gjet i vdekur në një nga banjot e shkollës. Ai ishte nxënës në Borg dhe, siç raportohet nga Kronen Zeitung, e konsideronte veten viktimë të ngacmimit.
Brenda, disa mësues janë ende të mbyllur në klasa me nxënësit. Të paktën njëri prej mësuesve është në kontakt me njësinë Eko-Cobra.
Ministri i Brendshëm Gerhard Karner ka mbërritur në vendngjarje. Tragjedia ndodh dhjetë ditë para dhjetëvjetorit të masakrës së Grazit: më 20 qershor 2015, ku një burrë drejtoi makinën me 100 kilometra në orë drejt turmës së njerëzve. Një djalë dhe një vajzë të moshës 28 dhe 24 vjeç dhe një fëmijë katërvjeçar humbën jetën.
Autoritetet nuk kanë dhënë ende detaje të plota mbi motivet apo identitetin e autorit. Hetimet janë në vijim.
