Prokuroria e Posaçme (SPAK) ka publikuar listën me emrat e 13 kandidatëve që janë në garë për të marrë drejtimin e Byrosë Kombëtare të Hetimit (BKH), pas përfundimit të mandatit të drejteses aktuale Aida Hajnaj.
Afati i aplikimeve u mbyll pasditen e djeshme në orën 16:00, teksa mes emrave në garë vihet re ai i ish-drejtori të Përgjitshëm të Policisë së Shtetit, Gledis Nano, zëvendësdrejtor i BKH-së, Joni Keta apo oficeri Mentor Cuku dhe ish-shefi i Policisë, Elton Kërluku.
Po ashtu, vihet re edhe emri i drejtorit të Përgjithshëm të Agjencisë Kombëtare të Mbrojtjes Civile, Haki Çako, i cili më herët ka qenë edhe drejtor i Përgjitshëm i Policisë së Shtetit.
Pjesë e listës janë edhe prokurori i Tiranës Andi Pogaçe dhe ish-prokurori i Shkodrës i shkarkuar nga vetingu Astrit Halilaj. Po ashtu në garë është edhe Artur Beu, i cili garonte edhe 5 vite më parë, kur u zgjodh Aida Hajnaj. Në 2015-ën, ai shërbeu si specialist i marrëdhënieve ndërkombëtare në Interpol.
Emrat e tjerë nga radhët e Policisë në garë për kreun e BKH-së janë Gentian Ndoi, i cili prej disa vitesh mban postin e drejtor për Hetimin e Krimit Ekonomik dhe Financiar në Drejtorinë e Përgjithshme të Policisë së Shtetit, si dhe Gentjan Shehaj, ish-drejtues i Policisë së Vlorës dhe Lezhës, teksa aktualisht është drejtor i kurrikulave në Akademinë e Sigurisë.
Në garë është edhe inspektori i AMP-së, Maoricio Sheldija, apo edhe Nevrus Ndregjoni, i cili aktualisht është oficer i policisë gjyqësore në Elbasan.
E vetmja kandidate grua në garë për të marrë drejtimin e Byrosë Kombëtare të Hetimit është Marinela Pilinci, e cila është oficere e Policisë Gjyqësore. Ndërkohë, Miklovan Kanani është emër i panjohur.
Më konkretisht, 13 kandidatët në garë për kreun e BKH-së janë:
- Andi Pogaçe
- Artur Beu
- Astrit Halilaj
- Elton Kërluku
- Gentian Ndoi
- Gentjan Shehaj
- Gledis Nano
- Haki Çako
- Joni Keta
- Maoricio Sheldija
- Marinela Pilinçi
- Miklovan Kanani
- Nevrus Ndregjoni
SPAK bën me dije se pas mbylljes së aplikimeve, procesi kalon në fazën e verifikimit paraprak, gjatë së cilës, Komisioni i Përzgjedhjes do të shqyrtojë dokumentacionin e paraqitur nga kandidatët për të vlerësuar përmbushjen e kushteve ligjore dhe kritereve të përcaktuara në ligjin “Për organizimin dhe funksionimin e institucioneve për të luftuar korrupsionin dhe krimin e organizuar”.
Kandidatët që kalojnë fazën e verifikimit paraprak do të ftohen për të marrë pjesë në fazat pasardhëse të procesit. Procesi i emërimit të drejtorit të ri do të kryehet duke kaluar në 7 faza, testi i arsyetimit logjik, kontrolli mjekësor, testi fizik, ese me shkrim, intervistë dhe më pas bëhet verifikimi i figurës, deklarimi i aseteve dhe testi i poligrafit.
Drejtueses aktuale të BKH-së, Aida Hajnajt, i përfundon mandati 5-vjeçar më 31 Gusht. Edhe pse kishte shprehur që më 28 mars interesin për një tjetër mandat, ajo u përjashtuar nga e drejta për rikandidim, pasi nuk dorëzoi dokumentacionin e kërkuar brenda afatit të caktuar nga Komisioni i Përzgjedhjes deri më 7 maj.
