Pas javësh negociatash intensive, transferimi i Kevin De Bruyne te Napoli është drejt finalizimit. Mesfushori belg ka arritur marrëveshjen me kampionët e Italisë dhe pritet të nënshkruajë një kontratë dyvjeçare, me opsion për zgjatje deri në sezonin 2027–2028. Vizitat mjekësore janë caktuar për fundjavën në Romë dhe, nëse gjithçka shkon sipas planit, firma do të zyrtarizohet menjëherë pas tyre.
33-vjeçari, që vjen pas një dekade të lavdishme me Manchester City, do të përfitojë një pagë vjetore prej afër 10 milionë eurosh, përfshirë bonuset. Ky është një nga operacionet më të mëdha të këtij sesioni merkatoje në Serinë A, duke e kthyer Napolin në protagonist absolut në tregun ndërkombëtar.
Pavarësisht moshës, De Bruyne vazhdon të tregojë formë të shkëlqyer. Ai së fundmi shënoi golin vendimtar për Belgjikën ndaj Uellsit në kuadër të kualifikueseve për Kupën e Botës, duke treguar se mbetet një lojtar i niveleve më të larta.
Presidenti Aurelio De Laurentiis e kishte përmendur më herët këtë lëvizje, duke theksuar rëndësinë strategjike të afrimit të një lojtari të tillë për objektivat madhorë që ka Napoli në katër fronte garimi. Ai shtoi se “kemi ndërtuar një skuadër që kërkon cilësi dhe eksperiencë, De Bruyne është pjesë e kësaj vizioni.”
Një tjetër detaj interesant është se De Bruyne do të ribashkohet me Romelu Lukaku-n, tashmë edhe ai pjesë e Napolit, duke sjellë te skuadra dy nga figurat më ikonike të Belgjikës moderne. Me këtë lëvizje, Napoli dërgon një mesazh të qartë: është gati për të luftuar për gjithçka.
