Cristian Chivu është zyrtarisht trajneri i ri i Interit, teksa klubi italian ka konfirmuar marrëveshjen me anë të një postimi në rrjetet sociale.
Chivu zëvendëson Inzaghin si trajner i zikaltëve ndërsa ka firmosur një kontratë dy-vjeçare e cila do të zgjasë deri në fund të sezonit 2026-27.
“FC Internazionale Milano ka kënaqësinë të mirëpresë Cristian Chivu-n si trajnerin e ri të ekipit të Parë. Trajneri ka nënshkruar një kontratë me Interin deri më 30 qershor 2027”, thuhet në një deklaratë në faqen e internetit të klubit.
44-vjeçari ribashkohet me Interin pas një periudhe katër-mujore në Serie A me Parmën, të cilës i siguroi mbiejtesën në Serie A në javën e fundit të sezonit 2024-25.
Chivu kaloi shtatë vitet e fundit të karrierës së tij si lojtar në San Siro me Interin, dhe gjithashtu filloi karrierën si trajner duke marrë drejtimin e ekipeve U14, U17, U18 të klubit dhe ekipit Primavera midis viteve 2018 dhe 2024.
Më pas ai u largua për të marrë drejtimin e Parmës në shkurt të vitit 2025, por tani është rikthyer për të marrë rolin e trajnerit të ekipit të parë me zikaltrit.
A new chapter waiting to be written ️
Cristian Chivu is our new head coach #ForzaInter #WelcomeCristian— Inter ⭐⭐ (@Inter_en) June 9, 2025
Ardhja e Chivu vjen gjashtë ditë pas largimit të Inzaghit. Inzaghi u largua nga Interi tre ditë pas një humbjeje të thellë 5-0 nga Paris Saint-Germain në finalen e Ligës së Kampionëve, në fund të një sezoni në fund të fundit zhgënjyes për trajnerin dhe skuadrën e tij.
Interi ishte në garë për një tripletë në prill, por u eliminua nga Kupa e Italisë në gjysmëfinale nga rivalët Milan, humbi titullin e Serie A ndaj Napolit me një pikë diferencë dhe më pas humbi 5-0 ndaj PSG në finalen e Ligës së Kampionëve.
Inzaghi u largua nga Interi katër vjet që nga emërimi i tij fillestar, dhe u largua me një titull të Serie A, dy trofe nga Kupa e Italisë, tre nga Superkupa e Italisë, si dhe dy medalje të finales së Ligës së Kampionëve (2023 dhe 2025).
