Kryeministri hungarez Viktor Orbán ka vënë në dyshim serioz aftësinë e Rusisë për të përballur NATO-n, duke deklaruar se Moska është shumë e dobët për një luftë të tillë.
Në një intervistë për kanalin francez LCI më 8 qershor, Orbán u shpreh se Rusia nuk ka qenë në gjendje të mposhtë as Ukrainën, ndaj nuk përbën rrezik të vërtetë për aleancën ushtarake perëndimore.
“Rusët janë shumë të dobët për një sulm të tillë,” deklaroi Orbán. “Ata nuk janë në gjendje të mposhtin Ukrainën, ndaj nuk janë të aftë të sulmojnë me të vërtetë NATO-n.”
Deklarata vjen pas më shumë se tre vitesh që nga fillimi i agresionit të plotë rus ndaj Ukrainës. Pavarësisht ofensivave të vazhdueshme, Rusia nuk ka arritur objektivat strategjike, përfshirë dorëzimin e Ukrainës apo pushtimin e plotë të rajoneve të Donetskut dhe Luhanskut – kërkesa që sipas raportimeve ishin pjesë e propozimeve të paraqitura nga Moska që në vitin 2022.
Orban shtoi se nuk është në interes të Bashkimit Evropian dhe as të Hungarisë që të përfshihen në një konflikt të drejtpërdrejtë me Rusinë. Ai kundërshtoi hapur anëtarësimin e Ukrainës në NATO, duke thënë se “kjo do të sillte rrezik lufte dhe përplasjesh që duhen shmangur.”
“Evropa duhet të forcohet në planin afatgjatë dhe duhet të arrijë një marrëveshje strategjike me Rusinë,” tha kryeministri hungarez, duke theksuar gjithashtu se sanksionet ndaj Moskës “po shkatërrojnë Hungarinë dhe gjithë Evropën.”
