Përgatitjet e Izraelit për një sulm të mundshëm ndaj objekteve bërthamore të Iranit thuhet se janë drejt përfundimit, raportoi Channel 12 të hënën e 9 Qershorit.
Sipas burimeve të këtij televizioni, hapat finalë janë në proces, duke përfshirë transferimin e municioneve dhe planifikimin operativ të detajuar nga forcat izraelite.
Kujtojmë se më herët gjatë ditës, inteligjenca iraniane paralajmëroi se çdo sulm izraelit ndaj objekteve bërthamore të saj do të pasohet jo vetëm me hakmarrje ushtarake, por edhe me një ndryshim të madh në politikën bërthamore të Teheranit.
Irani deklaroi se harta e objektivave në territorin izraelit është tashmë e kompletuar dhe çdo agresion do të sjellë një reagim të menjëhershëm ndaj objekteve të fshehta bërthamore që ata kanë.
Zyrtarë të lartë iranianë kanë konfirmuar drejtpërdrejt se, nëse Izraeli ndërmerr një sulm ndaj infrastrukturës bërthamore të Iranit, vendi do të largohet nga Traktati për Mospërhapjen e Armëve Bërthamore (NPT), një traktat ndërkombëtar që ka për qëllim ndalimin e përhapjes së armëve bërthamore.
Kjo do të shënonte fillimin e një programi aktiv për ndërtimin e armëve bërthamore nga Irani, gjë që do të kishte pasoja serioze për sigurinë rajonale dhe globale.
Këto zhvillime ndodhin në një moment kritik ku tensionet në Lindjen e Mesme janë në nivel të lartë.
