Victor Osimhen ka refuzuar ofertën e Al Hilal dhe nuk do të transferohet në kampionatin saudit, të paktën për momentin. Klubi arab kishte arritur një marrëveshje me Napolin për 75 milionë Euro, por lojtari vendosi të mos e pranojë kalimin.
Sulmuesi nigerian ka refuzuar gjithashtu një ofertë personale prej 35 milionë Eurosh në vit, plus 10 milionë Eurosh bonuse, me kontratë deri në vitin 2029.
Situata mbetet ende e hapur, pasi palët po përpiqen të kuptojnë nëse ekziston mundësia që Osimhen të ndryshojë mendim.
Ndërkohë, në prapaskenë qëndron edhe interesi nga klube të tjerë si Galatasaray. Klubi turk shpreson të përfitojë nga kjo situatë për ta mbajtur sulmuesin, të cilin në sezonin e fundit e kishin në huazim. Në Itali, Juventusi e ndjek me interes situatën, në rast se vendos të shesë Vlahovic.
