Italia e futbollit ‘vlon’. Humbja 3-0 kundër Norvegjisë në Olso ka bërë që klima të jetë e lagësht te të kaltërit, por jo nga shiu që shoqëroi gjatë gjithë ndeshjes turpërimin me tre gola në ndeshjen e tyre debutuese në kualifikueset e Kupës së Botës 2026.
Kombetarja italiane nuk ka qenë në finalet e dy Botëroreve të fundit dhe për t’u rikthyer do bëhet çdo gjë, qoftë edhe ndërrimi i trajnerit. Pas humbjes në Oslo ishte trajneri Luciano Spalletti i cili tha se do takonte presidentin e federatës, Gravina, pas ndeshjes kundër Moldavisë, e cila luhet nesër (e hënë) në Reggio Emilia.
Takimi i ditës së martë duket deçiziv për pankinën e nxehtë të Italisë, me Spallettin që është duke medituar dorëheqjen. Ndërkohë mediet në Itali kanë dhënë edhe dy zëvendësuesit e mundshëm që janë ish-trajneri që bëri mrekulli me Romën sezonin që sapo u mbyll, 73-vjeçari Claudio Ranieri dhe Stefano Pioli.
“Duhet të flas për gjithçka me presidentin Gravina. Ai më dha mundësinë të jem trajner dhe do ta falënderoj gjithmonë, pastaj ai mund të bëjë çfarë të dojë. Tani duhet të mendoj për këtë ndeshje dhe pastaj do të flas me Gravinën”, tha Luciano Spalletti pas humbjes turpëruese nga Norvegjia.
