Policia ka bërë me dije se ka gjetur armën e përdorur në krimin e regjistruar paraditen e sotme në fshatin Gosë të Rrogozhinës, ku 56-vjeçari Shpëtim Osma plagosi me armë zjarri komshinjtë e tij, çiftin e bashkëshortëve Sami dhe Nadire Disha.
Autoritetet policore bëjnë me dije se arma e zjarrit tip pistoletë, e cila dyshohet se është përdorur në krim është gjetur e fshehur në një mur dhe është sekuestruar në cilësinë e provës materiale.
Autori Shpëtim Osma u arrestua nga Policia, ndërsa çifti i bashkëshortëve Sami dhe Nadire Disha ndodhen në spital jashtë rrezikut për jetën.
Ngjarja ndodhi rreth orës 10:15, teksa burim i konfliktit mes komshingjëve dyshohet se ka qenë qeni i zhurmshëm, që lehte nëpër lagje.
Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
