Deputetja e Partisë Demokratike, Ina Zhupa, ka deklaruar se në një vend demokratik, rezultati i zgjedhjeve do të ishte shpallur brenda dy javesh.
E ftuar në një intervistë televizive, Zhupa tha se mazhoranca nuk e kontrolloi dot farsën zgjedhore, as me manovrat që bëri me Komisioni Qendror i Zgjedhjeve, as me votën e diasporës dhe as institucionet e tjera. .
Zhupa ngriti gjithashtu shqetësimin për mungesën e 130 mijë fletëve të votimit, të cilat sipas saj duhej të ishin të papërdorura, por ende nuk është bërë e qartë se çfarë ka ndodhur me to.
Më tej deputetja demokrate shtoi se kjo situatë është diskutuar edhe në Parlamentin Evropian, ku u konstatua se Shqipëria nuk zhvilloi zgjedhje të lira, por një proces të kontrolluar nga krimi dhe pushteti.
“Në një vend demokratik, në një vend që organizon zgjedhje të lira dhe të ndershme, rezultati do të dilte 2 ditë mbrapa dhe gjithçka do të ishte mbyllur atje.
Ajo që ndodh në Shqipëri është që çdo gjë ka dalë nga kontrolli, që mazhoranca dhe zgjatimet e saj qoftë në KQZ, qoftë në votë e diasporës, qoftë në institucionet e tjera, nuk kanë kontrolluar dot atë farsë elektorale që kanë bërë vetë, ju ka dalë nga kontrolli.
Kjo filloi që atë ditë në numërim, filloi duke u kuptuar se me shumë zarfa sesa ishin dërguar kishin ardhur, ku raportonte KQZ, një numër të caktuar zarfash për një qark, dhe më pas ktheheshin më shumë seç kishte dërguar KQZ.
Ky problem më pas u vu re edhe me atë që identifikoi Partia Demokratike, me mungesën e 130 mijë fletëve të votimit të cilat duhej të ishin të papërdorura por nuk dihet se çfarë ka ndodhur.
Është një proces që ne siç e diskutuam sot në Parlamentin Shqiptar dhe siç u diskutua në Parlamentin Evropian tregon qartësisht që Shqipëria nuk ka organizuar zgjedhje të lira dhe të ndershme por ka organizuar një farsë elektorale, të vendosur nga krimi, të vendosur nga pushteti, të vendosur nga metodat të cilat njihen botërisht si metoda manipulimi të zgjedhjeve, siç është për shembull Treni Bullgar i cili edhe në Bashkinë Finiq,unë e kam transmetuar me foto dhe me prova sesi Dhimitër Llajo, kushëriri i Vasil Llajos nxirrte fletën e votimit me vula jashtë për t’ia dhënë votuesve dhe më pas për të bërë atë teorinë e trenit ku kthehej një fletë dhe shkonte fleta tjetër.
Ajo që është me shumë rëndësi është që Partia Demokratike është e vendosur që këtë farsë elektorale ta çmontojë, ta denoncojë, ta bëjë të njohur, siç ishin dhe takimet e fundit të kreut të PD, Sali Berisha në Bruksel.
Ju i patë, takime jashtëzakonisht të mira ku në grupin e Partive Popullore Evropiane u vendos që do të dërgonin edhe një mision faktmbledhës për Shqipërinë.
Duhet zhveshur çdo ditë propaganda dhe duhet treguar shqiptarëve realisht se çfarë ka ndodhur në procesin e 11 majit, që tashmë jemi në qershor dhe nuk arrijnë dot të prodhojnë një rezultat përfundimtar të zgjedhjeve.
Unë kam 0 besim te proceset që po bën KQZ, apo te ato pak të drejta që jep KAS, sepse thelbin që është mosnjohja e zgjedhjeve, e ka rrëzuar, pra thelbi i diskutimit është që këto zgjedhje kanë prodhuar një rezultat që nuk përputhet me atë realin, me atë që kërkojnë njerëzit, që kërkojnë votuesit por një rezultat të ndryshëm.
Shqipëria një vend që në fushatë elektorale legalizoi parcela me drogë për shkak të ligjit që kishte miratuar Edi Rama, një vend ku oligarkët nuk njohin më asnjë kufi, as zonë të mbrojtur, as pronë ushtrie, as rezidencë qeveritare, ku të gjitha mund të jenë pjesë ndërtimore është normale që do të kalonim në këtë përçudnim të votës.
E rëndësishme është që ne duhet ta çmontojmë këtë farsë elektorale“, tha Zhupa.
