Tifogrupi shqiptar, “Shvercerat”, kanë njoftuar për organizim unik në Shkup. Pasi kanë mbetur pa bileta për ndeshjen kundër Serbisë, si të gjithë grupimet e tjera, kanë vendosur që të mblidhen në sheshin e qytetit të tyre.
Ata kanë ftuar të gjithë shqiptarët që ta mbështesin Kombëtaren në këtë mënyrë të veçantë. “Shvercerat” duan të tregojnë se dashuria për Shqipërinë nuk ka kufij dhe se kuqezinjtë nuk janë kurrë vetëm.
Ky aktivitet është i mbështetur edhe nga Komuna e Çairit dhe synon të sjellë më shumë bashkim, flamur dhe krenari shqiptare në zemër të Shkupit.
Të gjithë sytë janë te e shtuna ku në orën 20:45, Shqipëria do të presë për herë të parë Serbinë në Tiranë. Kjo ndeshje është e vlefshme për kualfikueset e Botërorit 2026.
Njoftimi i Shvercerave:
Nuk na ndalin dot me bileta, me rregulla, me urdhra! Ne jemi zëri i tribunes që s’humb kurrë – jemi Shvercerat, jemi Kuqezi, jemi Shqipëria e vërtetë! MOS MUNGO O JE ME KOMBIN, O JE KUNDËR TIJ! Aktiviteti organizohet nga tifo grupi “Shvercerat” dhe përkrahet nga Komuna e Çairit. Një Komb, Një Zë, Një Flamur!”
