Një shqiptar, i dënuar më parë për prodhim kanabisi dhe i dëbuar nga Britania, është lejuar të qëndrojë në vend edhe pse kishte hyrë sërish në mënyrë të paligjshme dhe kishte kryer vepra të tjera penale.
Stiljano Ziu u dënua me nëntë muaj burg në vitin 2018 për prodhim kanabisi, por u lirua para kohe me kushtin që të mos kthehej më në Britani pas dëbimit. Megjithatë, ai e theu këtë urdhër dhe u rikthye në mënyrë të paligjshme në fillim të vitit 2019. Pak kohë më vonë, ai u martua me një shtetase greke që jeton në Mbretërinë e Bashkuar, nëpërmjet së cilës kërkoi të drejtën për të qëndruar, raporton The Telegraph.
Pavarësisht kundërshtimeve të Ministrisë së Brendshme britanike, si dhe faktit që Ziu kishte hyrë ilegalisht në vend dhe kishte të kaluar kriminale, ai u mbështet nga dy nivele të gjykatës së emigracionit – të cilat vendosën se ai nuk përbënte rrezik për publikun apo për sistemin e imigracionit.
Ministria e Brendshme kundërshtoi vendimin, duke argumentuar se Ziu kishte treguar “mospërfillje flagrante” ndaj ligjeve të imigracionit dhe se duhej dëbuar, duke shtuar se lidhjet familjare të tij ishin të pamjaftueshme për të justifikuar qëndrimin dhe se ai mund të riintegrohej në Shqipëri.
Ndërkohë, në kohën e apelimit, Ziu ishte në pritje të një gjykimi për trafik droge. Gjykata vlerësoi se një ndjekje penale në proces nuk ishte e mjaftueshme për të ndaluar qëndrimin e tij, pasi ai mund të shpallej i pafajshëm.
Megjithatë, në nëntor të vitit të kaluar, Ziu u shpall fajtor për dy akuza për konspiracion në furnizimin me drogë të klasit B dhe u dënua me katër vjet e gjysmë burg.
Gjatë vendimit të fundit, gjykata deklaroi se tashmë i takon Sekretares së Brendshme të vendosë për çështjen e dëbimit. “Ky rast mund të rezultojë të ketë qenë vetëm një ushtrim akademik,” theksoi gjykatësi, duke lënë të kuptohet se dënimi i fundit mund të çojë në dëbimin përfundimtar të Ziu nga Britania.
Ky rast është një tjetër shembull i zbuluar nga “The Telegraph”, ku shtetas të huaj me precedentë penalë apo që ndodhen në Britani në mënyrë të paligjshme, kanë arritur të shmangin dëbimin duke u mbështetur në të drejtat e njeriut.
Në këtë kuadër, ministrja e Brendshme Yvette Cooper ka paralajmëruar masa të reja për të kufizuar fuqinë e gjyqtarëve në ndalimin e dëbimeve, përmes rregullave të reja ligjore që synojnë qartësimin e interpretimit të ligjeve të të drejtave të njeriut dhe forcimin e testit të interesit publik.
