Përfaqësuesit e Rusisë refuzuan përsëri një armëpushim pa kushte, tha sot Zëvendësministri i Parë i Punëve të Jashtme të Ukrainës dhe anëtar i delegacionit ukrainas, Sergiy Kislitsa, pas raundit të dytë të negociatave midis palëve ruse dhe ukrainase në Stamboll.
Në konferencën informative pas negociatave, ai tha se “Presidenti i SHBA-së Donald Trump propozoi një armëpushim pa kushte”, duke shtuar se kjo u diskutua me delegacionin amerikan, raportoi agjencia UNIAN.
” Delegacioni ynë i përsëriti të gjitha këto, por pala ruse nuk i pranoi propozimet “, njoftoi Kislica. Ai shtoi se rusët janë kundër përfshirjes së Shteteve të Bashkuara të Amerikës në negociata dhe deklaroi se Ukraina nuk është e kënaqur me këtë qëndrim.
“SHBA-të luajnë një rol shumë të rëndësishëm dhe janë një garantues i rëndësishëm i besimit. Për të siguruar një arkitekturë sigurie afatgjatë në Evropë, Amerika duhet të jetë e përfshirë sepse përndryshe nuk mund të flasim për qëndrueshmëri afatgjatë”, tha zyrtari ukrainas.
Kreu i delegacionit ukrainas, Ministri i Mbrojtjes Rustem Umerov, tha se sot të dy palët ranë dakord për një shkëmbim të ri të të burgosurve, si dhe për kthimin e 6,000 trupave të ushtarëve të vdekur në këmbim të 6,000 të vdekurve nga pala tjetër .
Siç raportoi agjencia ukrainase, kreu i delegacionit rus, Vladimir Medinsky, tha se Rusia i ofroi Ukrainës një armëpushim për dy ose tre ditë, gjoja me qëllim mbledhjen e trupave të të vdekurve.
