“Kujdes nga aleanca Rusi-Kinë”, apeli i Kallas: Duan ndryshimin e rendit global

Siguria evropiane dhe aziatike mbeten të ndërlidhura, deklaroi Përfaqësuesja e Lartë e BE-së për Punët e Jashtme, ndërsa fliste në një panel mbi sigurimin e stabilitetit global.

“Siguria jonë është shumë e ndërlidhur dhe ajo që duhet të bëjmë që të mos ndodhë skenari më i keq, është se duhet të mbrojmë të drejtën ndërkombëtare sepse kjo thotë gjithçka”, shpjegoi ajo.

Kallas foli pasi Sekretari i Mbrojtjes i SHBA-së, Pete Hegseth, paralajmëroi për rritjen e presionit ushtarak dhe ekonomik që vjen nga Kina.

Në fjalimin e tij në konferencë, ai i siguroi aleatët në Indo-Paqësor se nuk do të liheshin vetëm, ndërsa këmbënguli që ata të kontribuonin më shumë në mbrojtjen e tyre.

Hegseth tha se Uashingtoni do të forconte mbrojtjen jashtë shtetit për t’iu kundërvënë asaj që SHBA-të e shohin si një kërcënim në rritje nga Kina – veçanërisht në qëndrimin e saj ndaj Tajvanit.

Kina nuk e njeh pavarësinë e Tajvanit. Presidenti kinez Xi Jinping nuk e ka përjashtuar marrjen e tij me forcë. Kina dërgon rregullisht avionë dhe anije ushtarake pranë Tajvanit dhe aktualisht ka një aeroplanmbajtëse në juglindje të ishullit.