Produkti që shkaktoi helmimin e 17 fëmijëve në kopshtin shtetëror të qytetit të Gramshit ka qenë veza, e cila ka qenë e kontaminuar me salmonelë.
Kjo u vërtetua nga analizat e fundit të bëra nga Autoriteti Kombëtar i Ushqimit (AKU), teksa nga analizat e mëparshme të kryera në qumësht dhe mishin e pulës, rezultatet ishin negative.
Episodi i helmimit masiv ka ndodhur të martën (20 Maj), por ngjarja u mbajt e fshehtë nga institucionet shëndetësore, vendore dhe Policia, të cilat prej rreth një jave nuk kishin nisur hetim për rastin në fjalë. Ngjarja u mësua mesditën e së shtunës nga një familjar, i cili denoncoi publikisht helmimin e nipit të tij, duke publikuar dhe fletën e analizave, ku mjekja Dafina Jaho konfirmoi praninë e bakterit salmonelë.
Por, edhe pasi u konfirmua nga analizat, Autoriteti Kombëtar i Ushqimit (AKU), institucuion që drejtohet nga drejtori i komanduar Manush Kulolli, po mban të fshehtë për qytetarët emrin e kompanisë që ka hedhur në treg vezët e kontaminuara me salmonelë. Kjo përbën një rrezik, pasi vezët me salmonelë mund të shiten aktualisht në supermarkete dhe të konsumohen nga qytetarët.
Në lidhje me ngjarjen e Gramshit ka reaguar edhe kreu i Urdhrit Veterinar, Ervin Resuli, i cili në një postim në rrjetet sociale, shkruan se nga 5 kampionë vezësh të marra në Elbasan, të gjitha kanë rezultuar pozitiv me salmonelë.
Sipas tij, ky rezultat është alarmant dhe përbën një kërcënim të drejtpërdrejtë për shëndetin publik, veçanërisht në rastet kur produkti konsumohet pa përpunim të duhur termik. Resuli shkruan më tej se prania e Salmonella spp. në vezë mund të shkaktojë sëmundje akute gastrointestinale tek konsumatorët, me pasoja serioze për grupet më të ndjeshme të popullatës (fëmijë, të moshuar, gra shtatzëna, persona me imunitet të ulët).
“Mbi rezultatin e analizave laboratorike për prezencën e Salmonella spp. në mostra vezësh marrë nga kopeshti i femijeve ne Gramsh.
Në përgjigje të interesimit të gazetarëve dhe publikut mbi rastin e analizave të kryera në Institutin e Sigurisë Ushqimore dhe Veterinare (ISUV), sqarojmë si më poshtë:
Në datë 29.05.2025, ISUV publikoi rezultatet zyrtare për analizat mikrobiologjike të kryera mbi 5 kampione vezësh të marra zyrtarisht nga Autoriteti Kombëtar i Ushqimit (AKU), rajoni Elbasan. Të gjitha kampionet kanë rezultuar pozitive për prezencën e bakterit Salmonella spp., sipas standardit ndërkombëtar ISO 6579-1:2017.
Ky rezultat është alarmant dhe përbën një kërcënim të drejtpërdrejtë për shëndetin publik, veçanërisht në rastet kur produkti konsumohet pa përpunim të duhur termik. Prania e Salmonella spp. në vezë mund të shkaktojë sëmundje akute gastrointestinale tek konsumatorët, me pasoja serioze për grupet më të ndjeshme të popullatës (fëmijë, të moshuar, gra shtatzëna, persona me imunitet të ulët).
Bazuar në këtë situatë, rekomandojmë që:
Të ndërmerren menjëherë masa për ndalimin e tregtimit të këtij produkti.
Të gjurmohet dhe izolohet loti i vezëve të kontaminuara.
Të kryhet një kontroll sanitar-veterinar i plotë në fermën ose subjektin që ka prodhuar ose shpërndarë produktin.
Të njoftohet konsumatori dhe të garantohet asgjësimi i produktit të pasigurt, sipas procedurave ligjore.
Përgjegjesia bie mbi AKU për garantimin e sigurisë ushqimore dhe mbrojtjen e shëndetit të konsumatorit.”
Kujotjmë se kompania që furnizon kopshtet e Gramshit me ushqime, përfshirë kopshtin në fjalë, është “Nelsa shpk”, por ende nuk dihet se tek cila kompani ajo i ka blerë vezët e kontaminuara me salmonelë.
