Gjykata e Posaçme ka dhënë ditën e sotme vendimin për një pjesë të të pandehurve të fraksionit të dytë të dosjes “5D”, ku janë të përfshirë drejtorët e Bashkisë së Tiranës.
Bëhet fjalë për të pandehurit që akuzohen për abuzimet me tenderat e “Klubit Sportiv Tirana”, të fituara nga kompania “5D Konstruksion”, teksa pjesë e fraksionit të dytë të dosjes “5D” janë edhe abuzimet me tenderat e “Tirana Parking”
Ish-drejtoresha e “Klubit Sportiv Tirana”, Deborah Keçi është dënuar me 1 vit burg, e cila nga gjykimi i shkurtuar i është ulur dënimi në 8 muaj burgim.
Gjithsesi, GJKKO ia ka pezulluar dënimin me burg, duke ia konvertuar në 16 muaj shërbim prove. Po ashtu, Dëborah Keçit i është dhënë edhe dënim plotësues me heqjen e të drejtës për 5 vite për të ushtruar funksione publike.
Ndërkohë, anëtarët e Komisionit të Vlerësimit të Ofertave, Teuta Guri, Rejnaldo Gjerazi dhe Jetjon Mera janë dënuar me nga 9 muaj burgim secili, ku nga gjykimi i shkurtuar dënimi iu ulet në 6 muaj burgim. Gjithsesi, edhe ata, nëse vendimi merr formë të prerë, nuk do të përfundojnë në qeli, pasi GJKKO, ia u ka konvertuar dënimin me burg në 60 orë punë në interes publik brenda 6 muajsh.
Katër të pandehurit janë shpallur fajtor për veprën penale “Shkelja e barazisë së pjesëmarrësve në tendera apo ankande publike”, e kryer në bashkëpunim.
“Nga veprimet hetimore të kryera lidhur me këto procedime penale janë mbledhur provat dhe është provuar fakti se shoqëria tregtare “5D Konstruksion” sh.p.k (e njëjtë me shoqërinë me emrin “V.A.S Konstruksion” sh.p.k), e cila është zotëruar në mënyrë indirekte nga shtetasit Redi Molla dhe Mariglen Qato, ish funksionarë në cilësinë e Drejtorit të Përgjithshëm dhe Drejtorit të Drejtorisë në institucionet në varësi të Bashkisë Tiranë ka përfituar kontrata publike në kundërshtim me rregullat e prokurimit publik nga autoriteti kontraktor “Klubi Sportiv Tirana”.
Nga hetimet e kryera është provuar fakti se e pandehura Deborah Keçi në cilësinë e titullarit të autoritetit kontraktor “Klubi Sportiv Tirana”, institucion në varësi të Bashkisë Tiranë, në bashkëpunim me të pandehurit Teuta Guri, Jetjon Mera dhe Rejnaldo Gjerazi, në cilësinë e anëtarëve të Komisionit të Vlerësimit të Ofertave kanë krijuar për operatorin ekonomik “5D Konstruksion” sh.p.k avantazhe dhe privilegje të padrejta në procedurën e prokurimit me objekt “Rikonstruksion Palestra e Mundjes” të zhvilluar në datën 09.12.2020.
Nga provat e mbledhura gjatë hetimeve, është provuar fakti se e pandehura Deborah Keçi, në cilësinë e titullarit të autoritetit kontraktor është dakortësuar me përfaqësuesin e operatorit ekonomik “V.A.S Konstruksion” sh.p.k për ta shpallur fitues të procedurës së prokurimit që në fazën e përgatitjes së dokumenteve, ende pa u shpallur procedura.
Të pandehurit Teuta Guri, Jetjon Mera dhe Rejnaldo Gjerazi, në cilësinë e anëtarëve të Komisionit të Vlerësimit të Ofertave, nuk kanë ushtruar në përputhje me ligjin detyrën e tyre për vlerësimin dhe klasifikimin e ofertave, por kanë vlerësuar dhe klasifikuar në kundërshtim me rregullat e prokurimit publik operatorin ekonomik “5D Konstruksion” sh.p.k, i cili ka qënë i paracaktuar për tu shpallur fitues nga e pandehura Deborah Keçi.” – ka sqaruar më parë SPAK abuzimet me tenderat nga Klubi Sportiv Tirana.
Për fraksionin e dytë të dosjes “5D” janë marrë të pandehur edhe ish-drejtoresha Eglantina Zere, si dhe ish-zyrtarët Rivjola Baxha, Enkelejda Qyta, Bruno Koçi dhe Kristo Zhulati, të cilët akuzohen për abuzimet me tenderat e “Tirana Parking”.
Tenderat janë fituar nga kompania “5D Konstruksion”, e cila zotërohej në mënyrë indirekte nga dy ish-drejtorët e Bashkisë së Tiranës, Redi Molla dhe Mariglen Qato. Këta dy të fundit janë kaluar më herët për gjykim, pjesë e fraksionit të parë të dosjes, teksa ndodhen në burg bashkë me drejtorin tjetër Taulant Tusha.
