Një situatë alarmante ka ndodhur në Gramsh, ku disa fëmijë që frekuentojnë një kopsht publik janë helmuar, dyshohet nga ushqimi i konsumuar në institucion.
Një prind, rrëfen momentet e vështira që kaloi me fëmijën e tij, i cili qëndroi në trajtim me serum për më shumë se 72 orë, duke vuajtur nga të vjella dhe diarre të shpeshta.
Dyshohet se shkaku ka qenë konsumimi i një supe pule, ndërsa prindërit kanë dalë në protestë, duke kërkuar përgjegjësi dhe masa për parandalimin e rasteve të tjera.
Prindi: “Fëmija është më shumë se 72 orë në serum. Te fëmija im ka qenë rasti i pari. Pasi dolën analizat, e kemi trajtuar në shtëpi fëmijën. Fëmija kishte të vjella e diarre çdo 10 minuta. 72 orëshi ishte një tmerr. Kam binjakë dhe shyqyr që fëmija tjetër nuk u sëmur. Jemi të bindur se fëmijët janë helmuar në kopsht. Nusja thotë se kanë konsumuar supën e pulës, nga informacione jozyrtare. Kam frikë se mos përhapet sëmundja dhe fëmijën po e mbaj në banesë”
- Flet nëna: Kërkojmë siguri, sidomos për ushqimet që konsumojnë
Nëna e një prej fëmijëve te helmuar me salmonelë në një kopsht publik në Gramsh, gjatë protestës para bashkisë, ka folur për mediat, duke kërkuar garantimin e sigurisë ushqimore.
Ajo u shpreh se prej 8 ditësh, djali i saj është me simptoma të hemimit, ndërsa tha se janë në gjendje akthi dhe shoku.
Nëna e fëmijës: “Është i konfirmuar me salmonelë. Njoftimin e mora nga edukatorja e kopshtit të hënën. Sot po bëhen 8 ditë që vazhdon me dhimbje barku, stomaku, diarre. Temperature i zgjati 3-4 ditë. Për dezinfektime kam marrë vesh që janë bërë në kopesh dhe në spital. Kam edhe një vajzë. Kemi çuar analizat dhe po presim përgjigje. Ne jemi të kujdesshëm. Në fillim nuk e dinim dhe doktoresha më dha diagnozë për virozë të stinës, të enjten mora vesh që ka dalë me salmonelë. Si familje po bëjmë 8 ditë që jemi në gjendje ankthi, shoku dhe jemi goxha të trembur. Kërkoj që të paktën te fëmija im, kërkoj siguri, të paktën për ushqimin që konsumon”.
