Ndërsa opozita venezueliane ndaj Nicolas Maduros bën thirrje për bojkotimin e zgjedhjeve të së dielës, një nga figurat e saj kryesore u arrestua të premten, e akuzuar për përpjekje për të sabotuar zgjedhjet.
Juan Pablo Guanipa, një udhëheqës i njohur i opozitës venezueliane i afërt me udhëheqësen Maria Corina Machado, u arrestua të premten i akuzuar për komplot kundër zgjedhjeve legjislative dhe rajonale të së dielës, të cilat u bojkotuan nga opozita.
Ministri i Brendshëm Diosdado Cabello akuzon Guanipën 60 vjeç, se është një nga udhëheqësit e një rrjeti terrorist.
“Opozitari do të ndiqet penalisht për terrorizëm, pastrim parash, nxitje të urrejtjes dhe dhunës.”
Ministri transmetoi në televizionin publik imazhe të udhëheqësit, me pranga dhe të veshur me jelek antiplumb, përballë oficerëve të policisë të maskuar dhe të veshur me të zeza.
“U sekuestruan katër telefona, si dhe një laptop. I gjithë plani është aty. Tani ai do të mbahet përgjegjës para gjykatave”, tha Cabello.
Guanipa, ashtu si Maria Corina Machado, kishte jetuar i fshehur që nga zgjedhjet presidenciale të korrikut 2024, në të cilat opozita shpalli fitoren, duke u ankuar për mashtrim.
Këshilli Kombëtar Zgjedhor, i akuzuar se ka vepruar në varësi të qeverisë, shpalli Presidentin Nicolas Maduro fitues të zgjedhjeve pa dhënë detaje mbi votat, duke pretenduar se ka qenë viktimë e sulmit kibernetik që shumë ekspertë e konsiderojnë të pabesueshme.
Për këtë arsye, Maria Corina Machado bëri thirrje për bojkot të votimit të së dielës, duke premtuar qendra votimi bosh.
Një pjesë e opozitës do të marrë pjesë, duke besuar se është e nevojshme të votohet pavarësisht mashtrimeve të qeverisë .
Menjëherë pas arrestimit të tij, në rrjetet sociale të udhëheqësit të opozitës u shfaq një mesazh:
“Nëse po e lexoni këtë, kjo është sepse u rrëmbeva nga forcat e regjimit të Nicolas Maduros. Nuk kam siguri se çfarë do të më ndodhë në orët, ditët dhe javët në vijim. Por ajo për të cilën jam i sigurt është se do ta fitojmë luftën e gjatë kundër diktaturës. Sot jam i burgosur padrejtësisht, por kurrë i mposhtur. Gjithë çfarë u ka mbetur është frika. Ata fshihen pas brutalitetit dhe mizorisë për të ruajtur pushtetin e tyre.”
Maria Corina Machado reagoi në rrjetet sociale: “Ky është terrorizëm shtetëror i pastër dhe i thjeshtë. Guanipa është një njeri i guximshëm dhe me integritet. Ai është shoku dhe vëllai im.”
Kreu i diplomacisë amerikane, Marco Rubio, shprehu shqetësimin e tij pas këtij arrestimi të cilin e quajti “të pajustifikuar dhe arbitrar”.
Ai denoncoi një valë të re shtypjeje në vend përpara zgjedhjeve të së dielës. Shfaqja e fundit publike e Guanipës dhe ajo Machado, ishte më 9 janar dhe në një demonstratë të opozitës kundër inaugurimit të Maduros më 10 janar.
Cabello njoftoi gjithashtu arrestimin e 70 personave në lidhje me këtë përpjekje të dyshuar për të sabotuar zgjedhjet. Ai përmendi 11 persona të tjerë, përfshirë një ekuadorian, një argjentinas, një serb, një gjerman dhe disa pakistanezë.
Ai i akuzoi të ndaluarit se po planifikonin të vendosnin eksplozivë në spitale, stacione metroje, stacione policie dhe infrastrukturë elektrike, duke siguruar se autoritetet kishin sekuestruar eksplozivë, armë, detonatorë dhe para të gatshme.
Në mbrëmje, zyra e prokurorit lëshoi një deklaratë duke e quajtur Guanipën një “konspirator të rrezikshëm” që është pjesë e një organizate kriminale që kërkoi të sabotonte zgjedhjet presidenciale të 28 korrikut.
“Guanipa, i cili ka lidhje me strukturat e trafikimit të drogës, është i lidhur me një plan të ri veprimesh kriminale për të parandaluar mbajtjen paqësore të zgjedhjeve të së dielës ”, thuhet në tekstin e Prokurorit të Përgjithshëm Tarek William Saab.
