Gjykata Kushtetuese ka rrëzuar rekursin e Pëllumb Gjokës, i cili kërkonte kthimin e pronave të sekuestruara nga Prokuroria e Posaçme (SPAK) në kuadër të dosjes “Metamorfoza”.
Biznesmenit i janë sekuestruar 390 mijë metra tokë në plazhin e Velipojës me kërkesë të SPAK, pasi dyshohet se këto sipërfaqe janë përfituar me anë të falsifikimit.
Pëllumb Gjoka njihet dhe si pronar i një sërë pronave e objekteve me funksion shërbime, hoteleri apo lojëra fati, por të cilat nuk i janë përfshirë në sekuestrim.
Kolë Gjoka dhe “Shoqëria Imperial Group” pretendojnë se toka prej 390 mijë metrash katrorë në plazhin e Velipojës është ne emër të tyre dhe jo të biznesmenit.
Pavarësisht pretendimeve të shoqërisë Imperial Group dhe dy shtetasve Kolë dhe Pëllumb Gjoka të cilët e vlerësuan si jo kushtetues sekuestrimin, gjyqtarët e Kushtetueses e kanë konsideruar se duhet të qëndrojnë në fuqi vendimet e gjykatave më të ulëta.
Më herët, Gjykata Kushtetuese i ka rrëzuar Pëllumb Gjokës edhe padinë, ku vinte në pikepyetje vlefshmërinë e marrjes dhe përdorimit të mesazheve nga “Sky Ecc” në procese penale në Shqipëri.
Biznesmeni Pëllumb Gjoka u arrestua më 27 Korrik të vitit 2023, në bazë të një hetimi të zhvilluar nga SPAK. Bashkë me Pëllumb Gjokën u arrestuan edhe prokurori i Kukësit, Xhevahir Lita, ish-shefi i operacionales së Policisë së Shtetit, Oltion Bistri dhe personazhe të tjerë të kronikës së zezë në zonën e Shkodrës.
Ata akuzohen si pjesë e një grupi kriminal dhe mbi ta rëndojnë akuza të ndryshme, nga vrasja, sigurimi i kushteve dhe mjeteve për kryerje vrasjeje, korrupsion, shpërdorim detyre, pastrim parash e të tjerë.
Hetimi për këtë grup personash nisi, pasi SPAK administroi nga autoritetet franceze dhe belge të dhënat e ç’koduara nga aplikacionet Sky dhe Enchrochat.
Sipas SPAK-ut, Pëllumb Gjoka rezulton të ketë komunikuar me mesazhe me anëtarë të fisit Bajri në Shkodër për kryerje atentatesh, përfshirë pagesa për ekzekutorët dhe financim për blerje armësh.
