Ish-zv. komandati i Forcës Detare, Artur Meçollari duke folur në MCN mbi hetimin e dosjes së privatizimit të bazës detare të portit të Limionit në Sarandë, tha se ka dyshime të arsyeshme që SPAK-u është i ndikuar nga deklaratat e kryeministrit Edi Rama në lidhje me çështjen.
Megjithatë, ai vë në dukje se SPAK-u vetëm mund të shtyjë afatet proceduriale, por nuk e mbyll dot çështjen ku dyshohet të jetë e implikuar ish-ministrja e Mbrojtjes Olta Xhaçka. Sipas tij, gjykata për çështjen në fjalë ka provuar se është cenuar siguria kombëtare, marrëdhëniet me NATO-n, dhe operacionaliteti.
“Hetimi ka kaluar 4 vjet. Në 4 përgjigjet e fundit që më kanë ardhur, duke përfshirë të fundit, bëhet fjalë që vazhdon hetimi paraprak. Jemi në fazën e parë të hetimit. Kanë kaluar 4 vjet. Në përgjigjen e fundit SPAK-u më ka vonuar 2 muaj e gjysmë kthimin e përgjigjes, dhe thotë që po bëjmë hetime shtesë. Baza e Sarandës ka 2 vjet në sekuestro preventive dhe janë dokumentuar të gjitha provat, dhe provat janë të dorëzuara nga SPAK në gjykatë, dhe gjykata ka provuar që është cenuar siguria kombëtare, marrëdhëniet me NATO-s, dhe operacionaliteti.
Unë i bëra edhe një pyetje nëse ka tejkalim të afateve të hetimit, kësaj pyetje SPAK-u s’i ka kthyer përgjigje. Është e qartë që kanë kaluar afatet proceduriale, 4 vjet një hetim, që s’është aq i vështirë sa hetimet e tjera. S’e kuptoj cila është arsye pse SPAK-u e mban çështjen ne hetim paraprak?! Kur është marrë masa e sigurisë për bazën e Sarandës, gjykata e ka pranuar, që në lidhje me dy konktratat, në një rast është cenuar dekreti i Presidentit, për planin e vendosjes dhe përhapjen e FA, për kontratën me Marina Bay Saranda. Për Marina Limion është shkelur ligji për koncesionet.
Provat janë që kemi të bëjmë me shkelje, por fakti që SPAK-u po vonohet, të lë të kuptohet që ka diçka që nuk shkon. Nga të gjitha hetimet që ka bërë SPAK-u vetëm për këtë hetim kryeministri ka shprehur mosdakordësi dhe e ka quajtur skandaloze vendosjen nën sekuestro të bazës së Sarandës. SPAK-u duhet të jetë më i përgjegjshëm për një çështje me interes publik. A kanë lidhje vonesat e SPAK-ut me afatet proceduriale me deklaratat e kryeministrit, kjo është një pyetje që SPAK-u duhet t’i japë përgjigje.
Rasti konkret të ngre dyshime të arsyeshme që SPAK-u është i ndikuar nga deklaratat e kryeministrit në lidhje me çështjen. SPAK-u s’ka çfarë i bën! Vetëm një gjë mund të bëjë, të shtyjë afatet proceduriale, s’e mbyll dot çështjen. Ose do merren masa sigurie, ose çështja do shkojë direkt në gjykatë. Provat në dosje janë të plota. SPAK-u s’ka çfarë u bën dot provave, dhe s’e mbyll dot çështjen. Unë dyshoj që edhe nëse SPAK-u bën kërkesë për masa sigurie në Parlament, Parlamenti me një fuqi kaq të madhe s’besoj se do ta miratojë. Por s’është masa e sigurisë që e ezauron. Në fund do ta zgjidhë çështjen gjykata. Kemi disa vepra penale nga shpërdorim detyre, korrupsion, falsifikim dokumentacioni. SPAK-u është në provë, a ka influencë politike apo jo. E gjithë qeveria është e përfshirë në historinë e pronave detare, por në këtë histori s’duhet të përfshihet SPAK-u. Të mbajë qëndrim të qartë, a është i influencuar apo jo nga politika” – tha Artur Meçollari.
Kushtetuesja rrëzon kërkesën për heqjen e sekuestros së SPAK në Portin e Limionit
Rama sulmon SPAK-un për hetimet për portin e Limionit në Sarandë
Dokumenti në SPAK/ Belinda Balluku ju fali oligarkëve Portin e Limionit në Sarandë
