Tirana është hedhur në sulm dhe kërkon futbollistë për sezonin e ri.
Goditja e parë mund të jetë në portë, me bardheblutë që kanë hedhur sytë nga kampionati maqedonas ku ka shumë sportistë të mirë. Kështu, mësohet se Tirana ka kontaktuar me portierin e Rabotniçkit, Igor Aleksovskin, që të veshë dorezat bardheblu.
Burime në kampin bardheblu bëjnë me dije se kanë qenë vetë drejtuesit e skuadrës, të cilët kanë diskutuar si me klubin dhe lojtarin, nëse është i gatshëm për të bërë transferimin në kryeqytetin shqiptar.
Ende nuk ka një vendim final, por duket se Aleksovski do të jetë portieri i Tiranës për sezonin 2025-2026.
Futbollistit i mbaron kontrata në 30 qershor dhe ai është i lirë për të qenë pjesë e bardhebluve. Lojtari këtë sezon numëron 32 takime si titullar, duke qenë në fushë 2880 minuta.
Me këtë lëvizje duket se te Tirana dalin në plan të dytë si Gentian Selmani dhe Leon Kozi, dy portierët e këtij sezonin futbollistik.
