Kryetari i Partisë Mundësia, Agron Shehaj, ka folur për rezultatin e zgjedhjeve të 11 majit.
Shehaj tha se pritshmëritë kanë qenë më të larta por e konsideroi marrjen e dy mandateve në Tiranë, “një rezultat inkurajues“.
“Pritshmëritë janë gjithmonë më të mëdha. Unë dhe bashkëthemeluesit, kemi vënë një target ambicioz. Kishim objektiv të lartë. Kishim një pritshmëri të lartë që mund të arrinte në një grup parlamentar, nuk ishte e pamundur, për shtatë mandate.
Ne morëm dy mandate në Tiranë. Sigurisht nëse e krahasojmë me pritshmëritë e komentatorëve, ky do të ishte rezultat shumë i mirë, por me pritshmëritë tona, është minimumi që ne prisnim.
Sistemi elektoral është ndërtuar për të penguar partitë e reja. Por kjo është veshtirësia më e madhe, të hysh në Parlament. Ne kemi hyrë me dy deputetë. Kemi marrë vota në zona urbane, zona që mbahen si zona ku votojnë majtas. Është fillim inkurajues edhe pse prisnim më shumë
E kam thënë që ditën e parë, është projekt politik afatgjatë. Hyrja në Parlament është hapi i parë. Këtë patëm mundësi të bënim dhe ky është fillimi. Qytetarët do të kenë mundësi në katër vitet e ardhshme të na gjykojnë dhe vlerësojnë për punën. Çfarë kam bërë i vetëm në Parlament, qytetarët më kanë ndjekur dhe vlerësuar“, tha Shehaj.
I pyetur nga gazetari Ylli Rakipi lidhur me pretendimet e Partisë Demokratike se zgjedhjet janë manipular, Shehaj tha se gara nuk ka qenë e barabartë, por refuzoi pretendimet për vjedhje të zgjedhjeve.
“Vjedhja e votave është një shprehje. Kur flitet për vjedhje, flitet për një garë të pabarabartë. Fenomenet që kanë ndikuar negativisht në zgjedhje, kanë ekzistuar më parë dhe ekzistojnë edhe sot. Blerja e votës, presioni mbi administratën, kapja e ekonomisë dhe medias, kanë ndikuar në krijimin e një situate ku gara ishte e pabarabartë.
Ishim të vetëdijshëm që hynim në garë të tillë. Duhet ta ngremë zërin për këtë. Të thuash janë vjedhur? Si janë vjedhur? Ajo që duhet të bëjmë si opozitë është të flasim për fenomenet që i kanë kthyer këto zgjedhje, praktikisht mund të themi se rrotacioni politik është bërë shumë i vështirë në Shqipëri, por kjo mund të jetë alibi për forcat në opozitë, që nuk marrin mundimin të ndryshojnë sepse kanë kartën e regjimit apo padrejtësive që e dimë se ndodhin gjithmonë. Nëse më pyet a keni garuar në mënyrë të barabartë, unë them po, por nëse më pyet a janë vjedhur votat tuaja në kuti, sigurisht që jo“, tha Shehaj.
