Kandidatja për deputete e PD-së në Qarkun e Tiranës, Edith Harxhi ka reaguar, pas humbjes drastike të forcës politike ku ajo bën pjesë, në zgjedhjet parlamentare të 11 Majit.
Në një postim në rrjetet sociale, Harxhi rendit një sërë arsyesh të manipulimit të zgjedhjeve, duke nisur nga krimi i organizuar, populli i varfër, përçarja e opozitës, apo situata gjeopolitike aktuale.
Por, ajo ka edhe një mesazh për atë se çfarë duhet të bëjë PD-ja tani pas humbjes. Edith Harxhi shkruan se ata duhet të shohin nga vetja, ku të hapin partinë dhe të vlerësojnë qëndrestarët, pasi sipas saj, vetëm kështu arrijnë të ngrejnë besimin.
Reagimi i plotë:
Të nderuar miq, të dashur demokratë dhe qëndrestarë të votës së lirë,
Më është dashur disa ditë të kuptoj gjithëçka që ka ngjarë në 11 maj dhe më tej e për këtë arsye nuk munda të shprehem më parë.
Kjo që ka ndodhur në vendin tonë quhet juntë elektorale, patronazhim industrial alla sigurim i shtetit. E ndjej veten të pamundur ende të bëj një analizë për këtë gjëndje dhe shkulje nga binarët të shtetit dhe qytetarëve por mendoj se një kapje e tillë në përmasa tragjike por edhe komike deri diku, ka disa faktorë:
1. Neronin dhe bandën e tij narkomane që bëjnë gjithëçka për të mbajtur pushtet fhe ruajtur interesat me çdo mjet të dhunshëm.
2. Popullin e varfër, të pandërgjegjshëm, të frikësuar dhe të kapur nga rregjimi në disa raste.
3. Opozitën që e vranë, e shkatërruan, e përçanë, e përbuzën dhe në fund e lanë në mëshirë të votës së kapur e tjetërsuar, por edhe problemeve të saj për tu ringritur siç duhet me vlera dhe moral.
4. Situatës së ndërlikuar gjeopolitike ku pavarësisht sa të vegjël jemi ndikohemi lehtë nga përplasjet e mëdha dhe kahjet gjeostrategjike si të aleatit tonë të madh Amerikës ashtu edhe Europës në të cilën bëjmë pjesë. E në këtë teatër gjeopolitik Kllounët diktatorë (si ky i yni) luajnë pjesën e tyre.
Unë ndihem e nderuar që isha pjesë e një fushate ku unë dhe ne dhamë gjithëçka. Falenderoj me shpirt gjithë mbështetësit, ndjekësit, miqtë e mi, ata që më votuan dhe ata që nuk më votuan sepse kishin preferenca të tjera brenda llojit, të gjithë ata që më dëgjuan, më folën, më besuan, që i pashë në sy dhe më dhanë dorën. Kjo nuk ishte garë e ndershme në çdo aspekt, e megjithatë unë mora më të mirën e saj, takimin me shumë prej jush e shumë të tjerë që nuk më lexojnë dot këtu në FB. Falenderoj me zemër punëtorët e Partisë Demokratike, anëtarët e saj dhe qëndrestarët.
Unë jam luftarake dhe beteja ime është e moralshme. Do ta vazhdojë me po aq përkushtim sa në themelim, në rithemelim e më tej deri sa vlera të fitojë mbi antivlerën, e për këtë do të vazhdoj të kërkoj me ngulm që ne të shohim nga vetja, të hapim partinë dhe të vlerësojmë qëndrestarët në rradhë të parë sepse vetëm kështu arrijmë të ngrejmë besimin.
Ju falenderoj me mirënjohje për mbështetjen e vazhdueshme, unë mbetem ajo që isha në dhjetor 1990 dhe në dhjetor 2021 pa asnjë ndryshim… ju ftoj në rezistencë….
