Kryetari i Partisë Demokratike, Sali Berisha ka deklaruar ditën e sotme se rezultati në kutitë e votimit është i gatuar nga kriminelë elektoralë të Partisë Socialiste.
Në një konferencë për mediat, Berisha tha se rezultati nuk ka të bëjë me vullnetin e lirë të shqiptarëve të Diasporës duke shtuar se kjo është e vërteta.
Berisha tha më tej se ata kanë të dhëna të sigurta të manipulimeve monstruoze që janë bërë me votën e emigrantëve në Greqi, Itali, Romë veçanërisht dhe disa zona të tjera.
“Qëndrimi ynë është ky; ne kemi të dhëna të sigurta, të manipulimeve monstruoze që janë bërë me votën e emigrantëve në Greqi, në Itali, në Romë veçanërisht dhe disa zona të tjera, por edhe në ndonjë vend tjetër. Ne kemi të dhëna, kemi dhe mekanizmin, por ne po ndjekim procesin, sepse ndjekja e procesit, çka do të thotë; qëndrimi në proces është një domosdoshmëri që buron nga respekti për ligjin dhe shtetin ligjor. Kurse rezultati në kutitë e votimit është i tëri i gatuar nga kriminelë elektoralë të PS-së dhe nuk ka asgjë të bëjë me vullnetin e lirë të shqiptarëve në diasporë. Kjo është e vërteta,” tha Berisha.
