Policia e Korçës ka reaguar lidhur me operacionin e djeshëm, ku pas disa muajsh hetimesh, goditën një rast të shitjes së doazve të kokainës në lagje dhe në lokale të ndryshme të qytetit.
Si rezultat, në kuadër të operacionit të koduar “Brothers” janë arrestuar dy vëllezër, shtetasit Renato dhe Albi Dishnica, përkatisht 30 vjeç dhe 24 vjeç, banues në Korçë.
Të dy ata janë me precedent penal, pasi Renato Dishnica ka qenë më parë i dënuar për veprën penale “Prodhimi dhe shitja e narkotikëve”, ndërsa Albi Dishnica për veprën penale “Drejtimi i automjetit në mënyrë të parregullt”.
Tashmë mbi dy vëllezërit rëndon akuza për veprën penale “Prodhimi dhe shitja e narkotikëve”, kryer në bashkëpunim.
“Gjatë operacionit, në lagjen nr. 14, Korçë, shërbimet e Policisë kanë lokalizuar dhe ndaluar automjetin me të cilin lëviznin 2 shtetas të dyshuar për shitje të dozave.
Gjatë kontrollit në automjet dhe kontrollit fizik ndaj shtetasve Renato Dishnica dhe Albi Dishnica, shërbimet e Policisë gjetën dhe sekuestruan një sasi lënde të dyshuar narkotike Kokainë, të ndarë në doza, gati për shitje. Në vijim të veprimeve, gjatë kontrollit në banesat e këtyre shtetase u gjet një tjetër sasi Kokaine. Në cilësinë e provës materiale u sekuestruan në total 41.1 gramë Kokainë, 3 celularë dhe automjeti që këta shtetas përdornin për këtë veprimtari kriminale.” – njoftojnë blutë e qytetit juglindor.
Policia thotë se në bashkëpunim me Prokurorinë vijon puna për identifikimin dhe arrestimin e shtetasve të tjerë që mund të jenë përfshirë në këtë veprimtari kriminale.
Materialet procedurale i janë referuan Prokurorisë së Korçës për veprime të mëtejshme.
