Presidenti i Këshillit Europian, António Costa, ka refuzuar të japë një datë të mundshme për anëtarësimin e Shqipërisë në Bashkimin Europian, ndryshe nga çfarë bëri në Podgoricë, ku vendosi 2028 si afatin përfundimtar për mbylljen e negociatave me Malin e Zi.
I pyetur nga gazetarët në Tiranë për një afat të mundshëm për vendin tonë, Costa tha se po jetojmë një momentum, ku Ballkani Perëndimor është më pranë BE-së, se kurrë më parë dhe mundësia duhet shfrytëzuar.
Premtimet e Ramës se brenda 2030-ës do anëtarësohemi në BE duket se janë vetëm iluzione, pasi António Costa shprehet se kjo nuk është e lehtë dhe duhet ende punë.
“Ne po jetojmë momente tepër të veçanta në botë sot dhe në këto momente të veçanta ne më shumë se kurrë kemi nevojë të përshpejtojmë bashkimin e Europës dhe gjithë forcën e fuqinë e saj. Dhe kjo na sjell në këtë momentum për zgjerimin, sigurisht edhe për Ukrainën, Moldavinë dhe Gjeorgjinë nëse ata dëshirojnë. Por edhe për Ballkanin Perëndimor, që na ka treguar edhe më parë që do të bëhet pjesë e BE. Këtu s’ka garë apo konkurrencë. Dëshira ime është që të 6 vendet e Ballkanit Perëndimor të ecin përpara me negociatat e anëtarësimit, të përmbushin reforma. Kjo ka të bëjë me ndryshimin që ka për të sjellë, do të ndryshojë edhe mendësinë. Kjo nuk është e lehtë. Kjo është rruga e duhur për të ecur përpara. Këtë javë shkova në Serbi, Kosovë, Bosnjë Hercegovinë, Malin e Zi dhe Maqedoninë e Veriut dhe tani ja ku jam në Shqipëri. Pavarësisht vështirësive dhe problemeve të gjitha vendet e BP kanë një objektiv dhe dëshirë të përbashkët që të bëhen pjesë e BE, të ecin përpara dhe të hapi një kapitull të ri. Unë ju them të gjitha këtyre vendeve: ‘Mund të keni besim te BE!’ Besoni tek ne. Ne kemi një vullnet të qartë politik në KiE. Kemi angazhim të qartë nga KE se ky është momenti i duhet për të arritur rezultate dhe duhet ta përdorim këtë çast. Ajo që ka ndodhur në këto vende gjatë dy viteve të fundit, por edhe në BE ka ndryshuar komplet mendësia dhe qasja. Kjo gjë është e mundur”, deklaroi Costa.
