Banorët e njësisë numër 1 në Tiranë tregojnë, se kanë 30 vjet aty dhe jetojnë si në mesjetë. Rruga, sipas tyre, rezulton e shtruar në letra, por në të vërtetë i vetmi asfalt, është ai i unazës së madhe, që kalon 100 metra më larg. Për mikrofonin e emisionit “Stop” qytetarët shprehën shqetësimet e tyre:
“Ne jemi interesuar në organet kompetente për shtrimin e rrugës, kemi marrë përgjigje që kjo rrugë rezulton e shtruar, me ndriçim deri në fund të rrugës, me kanalizim, trotuar dhe sigurisht asfalt të shtruar. Ndërkohë që në realitet, unë duhet që të vesh çizmet për të kaluar tek ky asfalti imagjinar. Në hartë rezulton me emrin rruga “Teodor Gorcka”, por në dokumentacionet tona rezulton me rrugën “Balla.”
“Është shumë problem, kemi vështirësi të kalojmë me karroca. Kam 20 vjet këtu dhe po prap e njëjta situatë, 100 metra rruga e asfaltuar, kurse këtu me gropa.”
“Kjo rrugë është jetime, sepse të gjitha rrugicat e tjera të Shkozës janë të shtruara, kurse kjo jo.”
Administratorja e njësisë numër 1 Trëndelina Jaku, pas interesimit të emisionit “Stop” thotë se është bërë një adresim gabim, pasi punimet po bëhen nga ARRSH dhe ajo nuk ka, se nga ta dijë, se deri ku do të shkojë rruga.
Ndërkohë nga Drejtoria e Përgjithshme e rrugëve dhe ndriçimit publik në Bashkinë e Tiranës, na thuhet, që kjo rrugë nuk figuron e shtruar dhe për të projektuar planin, fillimisht banorët duhet të çojnë një kërkesë në njësi, që më pas të përcillet në bashki dhe të vlerësohet nga drejtoria përkatëse, e shoqëruar me një plan të mirëfilltë./tvklan
