Ka nisur procesi i numërimit të votave edhe në qarkun e Fierit. KZAZ nr. 61 në Patos ishte e para, pas përfundimit të dorëzimit të kutive nga 49 qendrat e votimit ku nisi numërimi, por rezultati i parë erdhi nga Lushnja. PS fiton me 121 vota, kundrejt 43 të PD-së.
Procesi ka nisur normalisht teksa po monitorohet nga vëzhgues vendas e të huaj. Në këtë KZAZ do të numërohet edhe kutia e votimit të qendrës 3079/3 e Burgut të Fierit.
403 të dënuarit me të drejtë vote e finalizuan këtë proces, ndërkohë që 370 prej tyre nuk mundën të ushtrojnë të drejtën e votës për shkak se i ndalon Kodi Zgjedhor për shkak të krimeve të rënda të kryera.
Nis numërimi në KZAZ 55 në Lushnjë. Janë duke u numëruar 6 kutitë e para nga 92 në total. Kjo KZAZ administron njësitë administrative apo ish komunat. Kutia e parë e numëruar nga qarku i Fierit vjen nga Lushnja, qendra 2811. PS fiton me 121 vota, kundrejt 43 të PD-së. Partia Mundesia ka marrë 7 vota.
