Dy forcat kryesore politike, Partia Demokratike dhe ajo Socialiste kanë nxjerrë përfaqësuesit e tyre nga selitë përkatëse për t’u bërë thirrje qytetarëve për të shkuar për të votuar, nisur dhe nga pjesëmarrja e ulët në këto zgjedhje parlamentare.
Nga demorkatët ka dalë drejtuesja politike e diasporës, Jozefina Topalli, e cila në një deklaratë nga selia blu iu drejtua shqiptarëve që të mos e nënvlerësojnë zërin e tyre dhe se dyert e votimeve hapen vetëm një herë në katër vjet.
“Sot është një ditë e bukur, dhe edhe më e bukur bëhet kur shqiptarët, dalin dhe votojnë me dinjitet dhe me zemër. Kanë mbetur edhe 2-3 orë, dhe fjala kyçe në të tilla raste është: votoni, votoni, votoni. Mos e nënvlerësoni zërin tuaj, ju keni një fuqi edhe më të madhe nga ç’mendoni. Dyert e votimeve janë vetë ato dyer që hapen vetëm një herë në katër vite. Atë ditë, siç është dita e sotme, ju keni mundësi dhe mund të ktheheni në promovues të jashtëzakonshëm të një kthese të madhe historike. Ndaj, hyni tek ajo derë, votoni, sepse vota nuk është vetëm një e drejtë, por ajo është edhe një përgjegjësi.
Në të njëjtën kohë, me këtë rast, duhet të falënderoj pa dyshim mijëra shqiptarë që jetojnë jashtë kufijve të Shqipërisë, të cilët jo vetëm janë regjistruar dhe kanë votuar gjatë kësaj periudhe në mënyrë masive me votën e tyre për një kthesë historike. Gjatë periudhës së kaluar, por edhe sot, me mijëra kanë ardhur dhe nuk kanë ardhur thjesht për të sjellë një votë. Ata kanë ardhur për të sjellë një mesazh, jo vetëm patriotizmi, por një mesazh për të gjithë shqiptarët se ditën që vendi ka nevojë për ta, ata janë këtu dhe dinë si të votojnë.” – u shpreh Jozefina Topalli.
Ndërkohë, nga selia rozë ka dalë zëdhënësja për zgjedhjet pranë PS, Silda Çepe, e cila po ashtu u bëri thirrje shqiptarëve pëe të votuar, pasi vota është fuqia e tyre.
“Të nderuar qytetarë, Deri në mbylljen e kutive të votimit kanë mbetur edhe pak orë – dhe çdo votë e juaja ka rëndësi. Në këtë ditë të jashtëzakonshme për demokracinë tonë, secili prej jush ka mundësinë të vendosë nëse Shqipëria do të ecë përpara apo do të shkojë në drejtim të paditur.
Prandaj: I bëjmë thirrje çdo prindi, çdo nëne e babai, gjysheje e gjyshi që të mendojnë për fëmijët e nipërit e tyre e të votojnë. I bëjmë thirrje çdo sipërmarrësi e çdo profesionisti, çdo punëtori e fermeri që me djersën e mundin e tyre e kanë çuar këtë vend përpara që të dalin e të votojnë. I bëjmë thirrje të rinjve e të rejave që besojnë tek Shqipëria moderne e europiane që të dalin të votojnë,
Votoni! Dilni dhe votoni! Merrni me vete një të afërm, një mik, një fqinj – dhe votoni për Shqipërinë që meritoni. Vota juaj është fuqia juaj. Përdoreni atë.” – u shpreh ajo.
