Kryetari i Partisë Demokratike, Sali Berisha, ka falënderuar qytetarët që kanë marrë pjesë në procesin zgjedhor deri në këtë orë dhe ka përsëritur thirrjen për një pjesëmarrje sa më të gjerë në votime.
Në një deklaratë për mediat, Berisha e cilësoi aktin e votimit si një detyrim madhor për çdo qytetar shqiptar mbi moshën 18 vjeç, një përgjegjësi ndaj vetes, familjes, shoqërisë dhe kombit.
“Një falënderim i veçantë për mijëra shqiptarë që nuk u regjistruan dot për shkak të burokracive dhe frikës së qeverisë ndaj votës së tyre, por që sot kanë ardhur nga ajri, toka dhe deti për të ushtruar të drejtën e votës,” u shpreh Berisha.
Ai theksoi rëndësinë e këtij momenti për të ardhmen e vendit dhe iu drejtua qytetarëve me një thirrje të drejtpërdrejtë: “Voto për veten tënde, për fëmijët e tu, për vendin tënd, për të ardhmen tënde. Voto për biznesin, për rrogat, për pensionet, për fermerët. Sot është dita për të mbrojtur interesat më të rëndësishme të çdo qytetari.”
Sakaq, ai tha se kushdo që shkel ligjin do të mbahet përgjegjës dhe se sot sovrani jep një verdikt historik.
Berisha: “Falënderoj ata qytetarë që gjer tani kanë hedhur votën e tyre, kanë votuar duke kryer kështu një detyrim madhor të çdo shqiptari mbi moshën 18-vjeçare. Detyrim madhor ndaj vetes, familjes, shoqërisë, Shqipërisë dhe kombit.
Një falënderim i veçantë dhe mirënjohje e pakufishme për ata mijëra e mijëra shqiptare dhe shqiptarë që nuk u regjistruan dot për shkak të burokracirave dhe frikës së qeverisë ndaj votës së tyre, por kanë vërshuar nga ajri, nga toka dhe nga deti dhe janë dyndur sot dhe po votojnë në Shqipëri.
Mirënjohja ime është e pakufishme ndaj tyre. Ata me votën e tyre i gjenden vendit dhe kombit në një moment, në të cilin kanë nevojë shumë të madhe. Së fundmi, edhe njëherë thirrja ime është për çdo shqiptar: voto, voto, voto për veten tënde, për fëmijët e tu, për vendin tënd, për të ardhmen tënde, të fëmijëve të tu, për biznesin, për rrogat, për pensionet, për fermën.
Pra, është një votim më shumë se kurrë për interesat më të rëndësishme të çdo qytetari. Tani, çdo gjë ka një vëzhgim ndërkombëtar shumë serioz dhe vëzhgim kombëtar po kaq serioz. Dhe secili që merr përsipër të shkelë ligjin në këtë proces, do bëhet përgjegjës në mënyrë absolute. Një gjë mund t’u them se sot sovrani jep një verdikt historik…
…Unë them sot sovrani do japë një verdikt historik dhe kjo është e vërteta. Po cili është ai që nuk i bindet historisë? Pra, kështu është kjo”
