Policia e Korçës ka reaguar në lidhje me rastin e denoncuar mbrëmjen e djeshme nga mediat dhe deputeti Edmond Spaho, ku pretendohej se në fshatin Podgorie të Maliqit kandidati i PS-së Arian Jaupllari po blinte vota.
Në video shfaqeshin persona të shtabit elektoral të Jaupllarit, të cilët pretendonin se kandidati për deputet kishte shkuar në atë fshat për takime, teksa në një video të dytë shfaqej një i ri, i cili pretendonte se Arian Jaupllari i kishte premtuar të ëmës së tij 100 mijë lekë të vjetra, të cilat do ja jepte të shtunën më 10 Maj, në këmbim të votës më 11 Maj.
Blutë e qytetit juglindor bëjnë me dije se nga kontrollet e kryera dhe nga deklarimet e marra të personave që shfaqeshin në video nuk kanë konstatuar ndonjë veprim që ka të bëjë me shit-blerjen e votave.
Ndërkohë, Policia e Korçës ka proceduar penalisht personin i cili ka regjistruar audio-videon, pasi ka refuzuar që të japë celularin, me të cilin ka filmuar pamjet.
Bëhet fjalë për shtetasin A. P, 34 vjeç, banues në Podgorie, Maliq, me precedent të mëparshëm kriminal dhe i dënuar për vepra penale në fushën prodhimit dhe shitjes së narkotikeve dhe të krimeve kundër personit. Ai akuzohet për veprën penale “Veprime që pengojnë zbulimin e së vërtetës”
Njoftimi i Policisë
Strukturat e Drejtorisë Vendore të Policisë Korçë porsa janë njohur me një postim në rrjetet sociale ku në dy video të postuara pretendohej se një kandidat për deputet i subjektit politik Partia Socialiste ka qene duke u ofruar shuma parash ne këmbim të votave banorëve të fshatit Podgorie-Maliq, menjëherë nisën punën për verifikimin e rastit.
Si rezultat i veprimeve të kryera nën drejtimin e Prokurorisë së Juridiksionit të Përgjithshëm Korçë, Specialistët e Seksionit për Hetimin e Krimit Ekonomik dhe Financiar në DVP Korçë, proceduan penalisht për veprat penale “Veprime që pengojnë zbulimin e së vërtetës”, për shtetasin A. P, 34 vjeç, banues në Podgorie, Maliq, me precedent të mëparshëm kriminal dhe i dënuar për vepra penale në fushën prodhimit dhe shitjes së narkotikeve dhe të krimeve kundër personit.
Nga veprimet hetimore të kryera, kontrollet dhe deklarimet e marra shtetasve të cilët shfaqeshin në këto pamje dhe kandidatit për deputet shtetasit A.J, nuk u konstatua ndonjë veprim i kundraligjshëm që ka të bëjë me shitblerjen e votave.
Gjithashtu, nga analiza e pamjeve filmike dhe nga verifikimet e kryera rezulton se shtetasi A. P., ka qenë personi i cili ka kryer regjistrimin audio-video të shtetasit që shfaqet në ato pamje.
Shtetasi A. P., ka refuzuar vënien në dispozicion të Policisë me qëllim ekspertimin të pajisjes me të cilën ka kryer ketë regjistrim, duke u bërë shkak për pengimin e hetimeve të mëtejshme nga strukturat ligjzbatuese.
Materialet i kaluan Prokurorisë Pranë Gjykatës së Shkalles së Parë të Juridiksionit të Përgjithshëm Korçë.
VIDEO E DENONCIMIT TË RASTIT
