Dinamo dhe Partizani do të përballen nesër në finalen e vogël mes tyre, për vendin e tretë për këtë sezon të Superiores. Dinamo u mund 2-1 nga Vllaznia, në një ndeshje mjaft të kontestuar nga blutë përsa i përket abitrimit, ndërsa Partizani barazoi pa gol ndaj Egnatias. Por, duke qenë se në sezonin e rregullt rrogozhinasit e kishin mbyllur klasifikimin sipër Partizanit, e kishin ata të drejtën të shkonin në finalen e madhe për titullin, edhe pse barazuan.
Nesër në orën 19:00, Dinamo dhe Partizani do të ndeshen në “Elbasan Arena”, në ndeshjen e fundit për të dy klubet për këtë sezon. Në konferencën para ndeshjes, Skënder Gega ka bërë të ditur se do të aktivizojë në këtë takim kryesisht lojtarë të rinj dhe ata që nuk kanë pasur shumë minuta gjatë këtij sezoni.
“Duke qenë se për të dy ekipet tashmë çdo gjë është vendosur, nesër për ne nuk ka rëndësi rezultati. Kjo ndeshje do na shërbej të ftojmë edhe lojtarë nga ekipet e moshave dhe Partizani B. Kjo do jetë nesër edhe qasja jonë me shumë lojtarë të rinj dhe me një pjesë të madhe që nuk kanë marrë minutazhin. E kemi për detyrë ti japim shans tjetër për të luajtur dhe bërë më të mire”, tha Gega.
