Emisioni “Xhadat” ishte në Fushë – Krujë në takimin përmbyllës që Edi Rama zhvilloj atje, të mërkurën, më 7 maj, ora 11:00 ku faktoj se si punonjës të Njësisë Administrative Fushë-Krujë dolën në takimin elektoral gjatë orarit të punës dhe po ashtu dhe nxënës të shkollës së mesme “Shote Galica”.
Punonjësi që u ndoq nga gazetarët e Xhadave e mohoj fillimisht faktin se ishte punonjës i Njësisë, duke treguar një identitet të rremë e krijuar një alibi të tijën. Por i vënë përballë fakteve të pakundërshtueshme Administratori i Njësisë Fushë- Krujë, pranoi se ai ishte punonjës i institucionit të tij, pranë zyrës së Bujqësisë.
Nga ana tjetër nxënës të shkollës së mesme Shote Galica u bënë gati në shkollë me flamuj dhe prej aty lanë klasat bosh dhe dolën të prisnin kryeministrin. Xhadat treguan me pamje si nga brenda shkollës fëmijët me flamuj në duar shkuan drejt e në fushatë, me pretendimin se kishin marrë leje.
“Përdorimi i detyruar në fushatë zgjedhore i administratës së institucionit brenda orarit të punës për qëllime zgjedhore dhe përdorimi i detyruar dhe i organizuar brenda orarit mësimor i nxënësve të sistemit shkollor parauniversitar në fushatë zgjedhore, premtimi ose ofrimi i përftimeve nëpunësve publikë, ose nxënësve për të marrë pjesë në veprimtari që lidhen me fushatën zgjedhore si dhe ushtrimi i presionit ndaj tyre për këtë qëllim” është i ndaluar me ligj.
