Gjykata e Posaçme e Apelit ka lënë në fuqi masën e sigurisë “Arrest me burg” ndaj 52-vjeçarit Bujar Shega alias Marsel Shega nga Elbasani.
Bujar alias Marsel Shega u ekstradua nga Itali në Shqipëri në prill të këtij viti, pasi ishte shpallur në kërkim nga SPAK në kuadër të operacionit ku u godit banda e Suel Çelës.
I konsideruar si “truri financiar” i bandës së Suel Çelës, ndaj tij SPAK ka ngritur akuzat për veprat penale “Trafikimi i lëndëve narkotike” dhe “Pastrimi i produkteve të veprës penale ose veprimtarisë kriminale”, kryer në kuadër të grupit të strukturuar kriminal.”
Marsel alias Bujar Shega ka qenë administrator i dy kompanive “Viola Green” dhe “Wonder Green”. Kompanitë e tij, kanë fituar tendera për pastrimin e disa qyteteve dhe Shega njihet për njohje dhe lidhje të forta në politikë.
Biznesmeni akuzohet se pastronte paratë e bandës së Suel Çelës, të përfituara nga krimi, teksa nga bisedat e zbërthyera në aplikacionin “Sky Ecc” rezultonte si i përfshirë në trafikun e kokainës nga vendet e Amerikës Latine drejt Europës.
