Kreu i PD-së Sali Berisha ishte pasditen e sotme në Korçë për mitingun përmbyllës elektoral për zgjedhjet e 11 majit në këtë qytet.
Berisha theksoi edhe një herë se më 11 maj, ndahen dy epoka.
Sipas tij, pas diktaturës staliniste, Shqipëria përjetoi një aksident këto 12 vite me narko-diktaturën.
“4 ditë na ndajnë nga një ditë e cila në të vërtetë, për ne shqiptarët ndan dy epoka. Ndan epokën në të cilën një popull i vuajtur në diktaturën më staliniste në rrugën drejt lirisë patëm një aksident, përjetuam 12 vite narko-diktaturë. Një regjim që bëri gjithçka të shtypë pluralizmin, opozitën, për të plaçkitur korçarët dhe shqiptarët. Bëri çdo gjë për t’i përzënë nga vendi i tyre.
Çdo korçar i mençur do të gjejë se Korça nga një vend shprese, nga një qytet i mrekullueshëm, i famshëm për dhuntitë e veta, kulturën, artdashjen, shpirtin punëtor, pastërtinë. Fermerët e Korçës burra dhe gra ndër më efiçientët në 12 vite u larguan nga Korça, Erseka, Pogradeci si kurrë në historinë e tyre. U larguan jo se nuk donin Korçën, Pogradecin apo Devollin. Me pasuritë e kësaj treve, me liqejtë mahnitës, me fermerët më të zotët, me intelektualët më të shquar, me artistët, këngëtarët, elitën e saj, Korça është vetëm për t’u admiruar. Ata u larguan se nga viti në vit rënia ekonomike u bë e madhe. Çmimet u rritën, vendet e punës u mbyllën“, tha Berisha.
