Një 21-vjeçare në Has ka rënë në prangat e policisë pasi një ditë më parë goditi me sende të forta një çift bashkëshortësh.
Ngjarja ndodhi në fshatin Pla pas një konflikti të dy familjeve për çështje pronash.
Sipas njoftimit të policisë 65-vjeçari është jashtë rrezikut për jetën, ndërkohë bashkëshortja e tij, 60-vjeçe ndodhet nën kujdesin e mjekëve.
Njoftimi i policisë:
Në vijim të informacionit të dhënë dje, për një konflikt për motive pronësie në fshatin Pla, bëjmë me dije se në vijim të veprimeve hetimore për këtë rast, specialistët për Hetimin e Krimeve të Komisariatit të Policisë Has arrestuan në flagrancë shtetasen:
A. S., 21 vjeçe, banuese në fshatin Pla, për veprat penale “Plagosja e rëndë me dashje” dhe “Plagosja e lehtë me dashje”.
Nga veprimet hetimore dyshohet se gjatë konfliktit për motive pronësie, kjo shtetase ka goditur me mjete të forta, shtetasit A. J., 65 vjeç dhe V. J., 60 vjeçe (bashkëshortë).
Shtetasi A. J. mori mjekim dhe është jashtë rrezikut për jetën, ndërsa shtetasja V. J. vijon të jetë në kujdesin e mjekëve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
