Ronaldo Nazário, i njohur si “Fenomeni” dhe pronari aktual i Real Valladolid, është sërish në qendër të kritikave nga tifozët e klubit spanjoll.
Legjenda e futbollit botëror është filmuar i dehur në dalje nga një restorant i njohur në Madrid, pak orë pasi Valladolid pësoi një tjetër humbje në kampionat.
Pamjet u shpërndanë me shpejtësi në rrjetet sociale, duke shkaktuar zemërim të madh te tifozët, të cilët tashmë janë të zhgënjyer nga menaxhimi i klubit nën drejtimin e Ronaldos.
Situata mes palëve ka ardhur duke u përkeqësuar, sidomos pas rënies nga La Liga, e cila u zyrtarizua pak ditë më parë.
Gjatë ndeshjes së fundjavës ndaj Barcelonës, grupet e organizuara të tifozëve protestuan në mënyrë të pazakontë: hodhën në fushë 60 mijë kartëmonedha false me fytyrën e Ronaldos dhe mesazhin “Shko në shtëpi dhe shite klubin”.
Kjo skenë mori vëmendje edhe ndërkombëtare, me Frenkie de Jong që u pa duke qeshur në stol teksa mblidhte disa prej tyre.
Për më tepër, Ronaldo nuk ishte i pranishëm në stadiumin ‘José Zorrilla’, ku ka munguar që prej 19 gushtit të kaluar.
Në vend të kësaj, ai preferoi të udhëtonte në Madrid për të ndjekur finalen e turneut të tenisit Masters 1000 mes Casper Ruud dhe Jack Draper.
Sipas mediave spanjolle, shitja e klubit është në prag të finalizimit dhe Ronaldo pritet të largohet përfundimisht nga drejtimi i Real Valladolid-it në ditët në vijim.
Por për shumë tifozë, dëmi tashmë është bërë dhe largimi i tij shihet si i vetmi hap për një fillim të ri.
