Rreth një muaj më parë , emisioni ”Stop” solli në vëmendje një ngjarje të rëndë, të ndodhur më 27 korrik 2021 në maternitetin “Koço Gliozheni”në Tiranë. Një vajzë e sapolindur humbi jetën pas dy ditësh, pasi gjinekologët përdorën pajisjen e quajtur forceps për ta tërhequr bebin. Foshnja u dëmtua në kokë e pas dy ditësh nuk ia doli.
Adelina Zeqiri, nëna e foshnjes tha se gjatë shtatzanisë, ishte ndjekur nga doktoresha Aida Hoxha dhe ecuria e saj dhe e fëmijës, ka qenë pa probleme. Meqë bebi ishte mbipeshë, Adelina me mjeken kishin vendosur që lindja të bëhej me operacion. Por të resë i nisën dhimbjet më shpejt, ndaj shkoi në maternitet.
Mjekja e saj nuk ishte në turn dhe e delegoi Adelinën te kolegu i saj Ervis Vata. Atë ditë e reja u la pa asnjë ndërhyrje nga stafi mjekësor. Të nesërmen, kur erdhi doktoresha që kishte ndjekur Adelinën, kjo e fundit ishte shumë e lodhur nga dhimbjet për të lindur vetë apo për të përballuar operacionin. Në këtë pikë, doktoresha Aida Hoxha, i bëri narkozë dhe e nxorri bebin përmes forcepsit, një pajisje metalike si lugë.
Pasi foshnja humbi jetën, çështja u referua në komisariatin numër 1, ku familjarët akuzuan stafin e maternitetit për humbjen e fëmijës. OPGJ Sokol Çollaku kërkoi menjëherë kryerjen e autopsisë së foshnjes nga Instituti i Mjeksëisë Ligjore.
Materialet iu kaluan prokurorisë dhe çështja iu caktua prokurores Mirela Mërtiri, e cila u hoq nga radhët e drejtësisë nga vetting-u. Prej gati 8 muajsh kjo çështje i kaloi prokurorit Bledar Valikaj.
“Stop” i drejtohet Institutit të Mjekësisë Ligjore për të kuptuar se pse raporti u vonua për 4 vjet. Pas transmetimit të “Stop” në prill 2025, më në fund Mjekësia Ligjore e çoi ekspertizën në prokurori ku provohet përgjegjësia e mjekëve për vdekjen e foshnjes dyditëshe.
