Nga Boldnews.al
Komisioneri për Mbrojtjen e të Dhënave Personale, Besnik Dervishi, i cili ka shprehur shqetësim të thellë për publikimin nga “Boldnews.al” të pagave “stratosferike” të drejtuesve të organizatave jo-qeveritare në Shqipëri, nuk ka mbajtur asnjë reagim publik dhe nuk duket se ka ndërmarrë asnjë nismë kundër një rasti flagrant-publikimit nga emisioni “Fiks Fare” në televizionin kombëtar, Top Channel, të të dhënave shumë sensitive shëndetësore të një kandidati të opozitës në qarkun e Shkodrës.
Në puntantën e datës 30 Prill 2025, emisioni investigativ publikoi materialin “Çrregullime deluzionale”, kandidati i PD-së në Shkodër me kartelë nga Spitali Psikiatrik!”. Kandidati Gentjan Ndoj, që garon me siglen e koalicionit të djathtë “Aleanca për Shqipërinë Madhështore”, citohet në emision të ketë deklaruar se “gjendja e tij është shumë e mirë dhe se ai synon Parlamentin”.
Por, emisioni ka këmbëngulur, duke publikuar të dhëna dokumentare mbi trajtimet e tij shëndetësore.
Është e paqartë se cili është interesi publik në këtë rast dhe përse një televizion me audiencë kombëtare ka zgjedhur të kryejë një puntatë në “prime time” për emër tejet periferik për audiencën e gjërë, i cili është një nga qindra kandidatët për zgjedhjet parlamentare të këtij viti.
Por, ndërkohë që linja editoriale e televizionit dhe emisionit e ka cilësuar me “interes publik”, materialet e trajtuara duket se përbëjnë një shkelje flagrante të të dhënave personale.
Në Shqipëri, prej vitesh ekziston një institucion përgjegjës për trajtimin e informacionit dhe të dhënave konfidenciale-Komisioneri për të Drejtën e Informimit-një strukturë e pavarur, e drejtuar nga ish deputetit socialist dhe ish-prefekt i caktuar nga kryeministri Edi Rama, Besnik Dervishi.
Mbrojtja e të dhënave personale, sidomos atyre shëndetësore, është një ndër prioritetet absolute të strukturave shëndetësore publike e private, si edhe të institucioneve përgjegjëse shtetërore.
Megjithatë, Komisioneri Besnik Dervishi nuk rezulton të ketë pasur asnjë reagim për situatën flagrante me të dhënat (të prezumuara si të vërteta) për kandidatin e opozitës për deputet.
“Boldnews.al” kreu verifikimet përkatëse dhe, të paktën deri në momentin e publikimit të këtij shkrimi, raporti i “Fiks Fare” është ende publik në faqen zyrtare të televizionit Top Channel, ndërkohë që nuk ka asnjë deklaratë zyrtare nga Komisioneri për Mbrojtjen e të Dhënave Personale.
Komisioneri Besnik Dervishi nuk është gjithnjë kaq pasiv. Në Prill të vitit 2025, kreu i institucionit kërkoi nga redaksia e “Boldnews.al” që të fshinte një artikull mbi pagat e drejtuesve të organizatave jo-qeveritare në Shqipëri.
Sipas Komisionerit Besnik Dervishi, raportimi me titull “Debati “amerikan” për USAID/ Ja sa janë rrogat e shefave të OJQ-ve në Shqipëri (LISTA)”, publikuar në 6 Shkurt 2025, përbën shkelje të Ligjit për Mbrojtjen e të Dhënave Personale dhe mos-fshirja shoqërohet me sanksione.
Në atë raportim, “Boldnews.al” ka publikuar të dhënat mbi pagat e disa prej drejtuesve të OJQ-ve, mbi “Listën e Pagave” të rrjedhura në media rreth 3 vjet më parë. Në shkrim nuk përmendet emri i asnjë prej drejtuesve të OJQ-ve, por vetëm inicialet e tyre.
Siç ka cituar redaksia në atë shkrim, “…Në respekt të shqetësimit publik të ngritur më herët nga Komisioneri për të Dhënat Personale, “Boldnews.al”, i cili posedon emrat e plotë të drejtuesve të organizatave jo-qeveritare, i ka vendosur në tabelë vetëm me iniciale….”.
Megjithatë, ky kujdes i shtuar i redaksisë duket se është konsideruar i pamjaftueshëm nga komisioneri Dervishi. Në shkresën “Kërkesë për fshirjen e të dhënave personale të publikuara”, datë 2 Prill 2025, ai deklaron se ky urdhërim, vjen pas ankesës së disa personave; O.C, J.H, A.B, I.L, pra vetëm iniciale, persona të paidentifikuar plotësisht.
Pra, Komisioneri për Mbrojtjen e të Dhënave Personale, ka angazhim të shtuar mbi një raportim, ku janë ruajtur në maksimum gjeneralitetet e individëve të përfshirë, por është tërësisht inaktiv kur një televizion kombëtar, publikon informacione shumë sensitive mjekësorë për një individ, të cilin e citon me emër, mbiemër e fotografi.
