Janë zbardhur detaje të reja nga hetimet për zbardhjen e vrasjes së 58-vjeçarit Renato Hoxhaj, i cili u ekzekutua në orët e para të mëngjesit të 27 Prillit në lagjen “Hajro Çakërri” të Vlorës.
Burime bëjnë me dije se në Tiranë është ndaluar shtetasi me inicialet E. Mehmeti, i cili dyshohet se ka ndihmuar autorin e vrasjes për t’u larguar nga vendi i ngjarjes. Ai është me origjinë nga Tropoja dhe merret me shitje pronash, teksa njihet dhe si mik i Roan Brahimit alias Sidorel Prendit, i ekzekutuar në Maj të vitit të kaluar në Athinë.
Më konkretisht, grupi hetimor ka idenitifkuar makinën me të cilën ka lëvizur vrasësi, e cila rezulton se shtetasi E. Mehmeti ia ka dorëzuar para krimit, teksa i ishin ndërruar edhe targat.
Burime për mediat bëjnë me dije se të ndaluarit i është sekuestruar një celular, brenda të cilit janë gjetur të dhëna të vlefshme për hetimin, të dhëna të cilat të çojnë në dyshimet se vrasja është porositur nga Dubai.
Pas krimit, vrasësi dyshohet se është larguar drejt Greqisë përmes kufirit të gjelbër, kjo ka bërë që të ushtrohen kontrolle ditën e djeshme në zonën e Ksamilit.
Policia po punon për identifikimin e autorit të vrasjes, i cili është filmuar nga një kamer sigurie, ku shfaqet i veshur me të zeza, me kapele në kokë dhe fytyrën të mbuluar me një maskë.
58-vjeçari punonte si roje, teksa u ekzekutua pranë banesës së tij, kur po kthehej në orët e para të mëngjesit të së dielës. Mbi Renato Hoxhajn autori qëlloi katër herë me armë zjarri pistoletë, ku 58-vjeçari mori dy plumba në trup dhe dy në kokë. Nga hetimet paraprake dyshohet se autori ka hyrë nga një rrugicë pas pallatit ku 58-vjeçari punonte, duke i dalë këtij të fundit përballë dhe më pas është larguar përsëri në rrugica.
Renato Hoxhaj jetonte i vetëm në shtëpi, teksa prej dy vitesh bashkëjetonte me një grua të komunitetit rom. Ai ishte babai i dy fëmijëve të rritur. Gruaja e tij e parë jetonte në Itali dhe shpesh fëmijët vinin për ta takuar.
